Sfida e kalimit nga naftë-benzina në elektrike
Ndalimi i planifikuar i makinave të reja me benzinë dhe naftë në BE nga viti 2035 kërcënon industrinë evropiane të automobilave, pohon kreu i prodhuesit gjerman të makinave BMW, duke paralajmëruar se asnjë anëtar i Unionit nuk është “as afër” të shesë vetëm makina elektrike,.
Që prodhuesit evropianë të makinave të jenë përsëri konkurrues, politikanët duhet të përcaktojnë kornizën për përparim dhe prosperitet, jo të bllokojnë teknologjitë e suksesshme, tha shefi i BMW, Oliver Zipse në Motor Show në Paris.
Kërkesa e dobët për makina elektrike është një problem tregu që nuk mund të zgjidhet me stimuj afatshkurtër të qeverisë, sipas Zipse.
Stimujt e qeverisë për blerje sjellin kosto të mëdha dhe sjellin vetëm rezultate afatshkurtra, pohon kreu i prodhuesit gjerman të makinave luksoze, duke theksuar se e gjithë kjo shkakton përçarje në konkurrencën në treg.
Ndërtimi i stacioneve të karikimit të automjeteve elektrike
Shteti, thotë ai, mund të ndihmojë në ndërtimin e stacioneve të karikimit për automjetet elektrike dhe stacionet e mbushjes me hidrogjen.
Vendet e BE-së dhe Parlamenti Evropian kanë vendosur de facto të ndalojnë shitjen e makinave të reja me benzinë dhe naftë nga viti 2035, por Zipse mendon se ata duhet të rishqyrtojnë urgjentisht këtë qëllim.
Asnjë vend i BE-së nuk është afër shitjes vetëm të makinave elektrike, theksoi kreu i BMW-së, duke kujtuar se tregjet e mëdha të huaja, si Shtetet e Bashkuara të Amerikës dhe Kina, synojnë të mbajnë motorët me benzinë dhe naftë edhe pas vitit 2035. /tesheshi.com/
