Ndalohet megaprojekti hekurudhor i Vuçiçit dhe Orbanit
Evropa ka bllokuar projektin e madh të Aleksandar Vuçiçit dhe Viktor Orbanit, një hekurudhë e shpejtë ndërmjet Beogradit dhe Budapestit, shkruan Nova.rs.
Për këtë është folur për një kohë të gjatë në Hungari, por tani është gjithnjë e më e qartë edhe në Serbi se linja e tyre moderne hekurudhore, e cila po përparon me shpejtësi të plotë nga Beogradi në veri, mund të përfundojë në mes të Vojvodinës.
Indikacione serioze se ekziston një problem u shfaqën në vjeshtën e vitit 2023, kur mediat hungareze njoftuan se kontraktorët kinezë nuk mund të ndërtonin në përputhje me standardet evropiane, shkruan Nova.rs. Në shkurt erdhi informacioni se një pjesë e punimeve pranë Budapestit ishin pezulluar.
Punimet ishin praktikisht vetëm në periferi të qytetit kryesor hungarez. Në pjesën serbe po punohet shumë, vëren portali, por nuk ka gjasa që njoftimet për udhëtimin dy orë e gjysmë mes dy kryeqyteteve të realizohen së shpejti.
Probleme duket se ka kudo, përveç Serbisë. Me sa duket, kinezët po heqin dorë nga projekti, e të pakënaqur janë edhe hungarezët. Domethënë, problemi është se ndërtuesit kinezë nuk dinë të zbatojnë sistemin evropian të sigurimit dhe kontrollit të trenave. Thuhet se kompanitë gjermane u kanë ofruar ndihmë për atë pjesë të punës, por Pekini refuzoi.
Zyrtarët hungarezë nuk po mbajnë qëndrim publik, por mediat përcjellin frikën e publikut se Hungaria do të mbetet në bllokimin e trafikut të Evropës për shkak të projektit.
Domethënë, kinezët mund ta përfundojnë projektin duke përdorur standardet e tyre dhe ta vënë në punë hekurudhën duke e lidhur me seksionin në Serbi, por ajo rrugë nuk do të mund të lidhet me pjesën tjetër të rrjetit evropian. Kjo është arsyeja pse BE-ja mund t’i drejtohet rrugëve përmes Sllovenisë dhe Kroacisë. /tesheshi.com/
