Një delegacion i Komunës së Gostivarit i drejtuar nga kryetari Nevzat Bejta dhe kryetari i Këshillit Komunal Nasir Musliu, sot në 19 vjetorit e ngjarjeve të përgjakshme të 9 Korrikut të vitit 1997, bënë homazhe në vendprehjen e dëshmorëve të flamurit kombëtar, Shpend Iseini dhe Nazmi Saliu.
Fillimisht, delegacioni qëndroi në fshatin Turçan të Vogël ku bashkë me familjaret dhe bashkëfshatarët vendosën lule të freskëta mbi varrin e dëshmorit Nazmi Saliu.
Delegacioni i Komunës së Gostivarit homazhet i vazhdoi në fshatin Forinë tek vendprehja e dëshmorit Shpend Iseini.
Në shoqëri të familjarëve dhe banorëve vendas, kryetari Nevzat Bejta u shpreh që përkujtimi i dëshmorëve të 9 Korrikut mbetet obligim institucional i Komunës së Gostivarit, nga shkaku se dëshmorët flijuan jetën e tyre për të mbrojtur flamurin kombëtar i cili tani pas 19 vitesh qëndron para objektit të Komunës së Gostivarit, pikërisht në vendin ku në vitin 1997 shteti e largoi në mënyrë të dhunshme.
Të pranishëm në homazhe ishin edhe ministri Valdet Xhaferi, deputeti Jamin Sinani, këshilltarë komunal, si dhe drejtues institucionesh në nivel lokal dhe qendror.
