Në vitin 2023, emri Muhammad ishte zgjedhja më e popullarizuar për djemtë në Angli dhe Uells, ku më shumë se 4600 fëmijë janë regjistruar me këtë emër.
Ky emër ka qenë ndër dhjetë emrat më të popullarizuar për djem që nga viti 2016 dhe tashmë ka kaluar emrin më të përdorur më parë, Noah, sipas të dhënave nga Zyra për Statistika Kombëtare (ONS), shkruan bbc.
Megjithatë, ka dallime rajonale, pasi Muhammad nuk bën pjesë ndër dhjetë emrat më të popullarizuar në tre rajone të Anglisë. Variantet e tjera të emrit, si Mohammed dhe Mohammad, gjithashtu janë përfshirë në listën e 100 emrave më të popullarizuar për djem në Angli dhe Uells.
ONS trajton çdo variant të emrit si të veçantë, dhe forma të ndryshme të emrit Muhamed kanë qenë të popullarizuara prej vitesh, transmeton Telegrafi.
Olivia – Emri më i popullarizuar për vajzat
Për vajzat, emri Olivia mbetet zgjedhja më e popullarizuar, e ndjekur nga Amelia dhe Isla. Kjo renditje ka mbetur e pandryshuar që nga viti 2022.
Emra të rinj që hynë në listën e 100 emrave më të popullarizuar për vajzat janë Lilah, Raya dhe Hazel, ndërsa për djem u shtuan emrat Jax, Enzo dhe Bodhi.
Emra të frymëzuar nga figura të njohura
ONS raportoi se kultura pop mbetet një burim frymëzimi për emrat. Për shembull, këngëtaret si Billie Eilish dhe Lana Del Rey, si dhe fëmijët e familjes Kardashian-Jenner, Reign dhe Saint, kanë ndikuar në këtë trend. Po ashtu, emra si Miley, Rihanna, Kendrick dhe Elton kanë parë një rritje popullariteti, ndoshta për shkak të albumeve, tureve ose paraqitjeve të tyre të spikatura gjatë vitit 2023.
Rënie në popullaritet për emrat mbretërorë
Emrat mbretërorë si George, Archie, Harry dhe Charlotte, së bashku me Elizabeth dhe Charles, kanë vazhduar të bien në popullaritet, duke ndjekur një trend që zgjat prej disa kohësh. Të dhënat për emrat më të popullarizuar për vitin 2024 pritet të publikohen në një datë ende të pacaktuar. /Telegrafi/
