Mohammad Abu Salmiya, drejtor i spitalit Al-Shifa, u bëri thirrje organizatave ndërkombëtare që merren me të drejtat e të burgosurve “të vizitojnë të burgosurit dhe të shohin kushtet e vështira që ata po përjetojnë brenda burgjeve”
Drejtori i spitalit Al-Shifa në qytetin e Gazës ka thënë se disa palestinezë në burgjet izraelite vdiqën gjatë marrjes në pyetje për shkak të torturave, neglizhencës mjekësore dhe privimit të ilaçeve, raporton Anadolu.
Duke folur në një konferencë për shtyp pas lirimit të tij, Mohammad Abu Salmiya, tha se ai dhe palestinezët e tjerë të liruar lanë pas të burgosurit palestinezë në burgjet izraelite “të cilët përjetojnë kushte të vështira”.
Ai shtoi se të burgosurit palestinezë i nënshtrohen torturave fizike dhe psikologjike dhe u ofrohen pak sasi ushqimi.
“Të burgosurit e Gazës humbën mesatarisht 25 kilogramë nga pesha e tyre për shkak të mungesës së ushqimit”, tha Abu Salmiya.
Ai gjithashtu vuri në dukje se mjekët dhe infermierët izraelitë ishin gjithashtu pjesë e sulmit dhe ndëshkimit të të burgosurve palestinezë, duke mos u ofruar atyre trajtimin e nevojshëm mjekësor.
“Mjeku atje i ka rrahur të arrestuarit, infermierja i ka rrahur të arrestuarit”, tha Abu Salmiya.
Ai u bëri thirrje organizatave ndërkombëtare që merren me të drejtat e të burgosurve “të vizitojnë të burgosurit dhe të shohin kushtet e vështira që ata po përjetojnë brenda burgjeve”.
Dje, Izraeli liroi Mohammad Abu Salmijan dhe rreth 54 palestinezë, përfshirë mjekë, të cilët u ndaluan nga spitali Al-Shifa dhe objekte të tjera mjekësore në operacionet ushtarake gjatë muajve të fundit.
Abu Salmiya u arrestua më 23 nëntor së bashku me një staf mjekësor teksa udhëtonte nga qyteti i Gazës drejt jugut të enklavës pas një bastisjeje izraelite në spital.
Duke shkelur rezolutën e Këshillit të Sigurimit të OKB-së që kërkon një armëpushim të menjëhershëm, Izraeli është përballur me kundërshtimin ndërkombëtar në mes të ofensivës brutale të vazhdueshme në Gaza që nga sulmi i 7 tetorit nga grupi palestinez Hamas.
Të paktën 37.900 palestinezë janë vrarë që atëherë, kryesisht gra dhe fëmijë, si dhe mbi 87 mijë të tjerë janë plagosur. Mbi tetë muaj pas luftës izraelite, pjesë të gjera të Gazës janë kthyer në gërmadha mes një bllokade gjymtuese të ushqimit, ujit të pastër dhe ilaçeve.
Izraeli akuzohet për gjenocid në Gjykatën Ndërkombëtare të Drejtësisë, vendimi i fundit i së cilës e urdhëroi Tel Avivin të ndalojë menjëherë operacionin ushtarak në qytetin jugor Rafah, ku mbi një milion palestinezë kanë kërkuar strehim nga lufta përpara se qyteti të pushtohej më 6 maj.
