Policia britanike është duke vazhduar me hetimin e rastit të 39 trupave të pajetë që janë gjetur brenda një kamioni, për të cilët autoritetet e sigurisë kanë konfirmuar se ishin shtetas kinezë.
Sipas policisë ata ishin ngrirë në kamionin frigorifer, ndërsa fokusi i hetimeve qon në atë që dyshohet se bëhet fjalë për kontrabandim me qenie njerëzore.
Megjithatë ende nuk dihet saktë se si, ku dhe kur është arrestuar shoferi i këtij kamioni, që është identifikuar si Mo Robinson, 25-vjeç.
Informatat e parë flasin se ai është arrestuar menjëherë pasi është konstatuar se ishte shoferi, por miqtë e tij kanë deklaruar se Robinson kishte mbetur i habitur kur kishte hapur dyert e kamionit dhe nga ajo çfarë kishte parë, ishte rrëzuar në tokë pa vetëdije.
Në anën tjetër ekipet emergjente dhe policia kishin gjetur gjatë të mërkurës trupat e 31 meshkujve dhe 8 femrave në një kamion në afërsi të një zone industriale në qytetin anglez Essex, rreth 30 kilometra në lindje të Londrës.
Rimorkioja e kamionit ishte frigorifer brenda të cilit temperaturat mund të arrijnë deri në minus 25 gradë celsius, që do të thotë se ka qenë e pamundur që personat që ishin brenda t’i përballojnë të ftohtit.
E sipas policisë angleze rimorkioja e kamionit kishte mbërritur në Britani të Madhe ndaras nga kamioni. Fillimisht kamioni kishte mbërritur në Irlandën e Veriut e më pas është parë në Dublin. Në Britani të Madhe ishte futur përmes portit detar Hollyhead, e rimorkio kishte mbërritur nga Belgjika, ku në anën tjetër gjykata belge ka njoftuar se si në atë vend kishte qëndruar për një kohë të shkurtër.
Shefi i policisë belge ka pranuar se ekzistojnë gjasa të mëdha që në portin e Belgjikës të jenë futur personat në rimorkio, e cila më pas vuloset dhe niset për në destinacion.
Por, hetuesit kanë konstatuar se rimorkioja ishte transportuar në portin anglez përmes rrugës detare (me anije). Aty e kishte pritur një kamion të cilin po e ngiste Mo Robinson. Nga aty ishte nisur i montuar kamioni me rimorkio, ku për pesë minuta kishte përshkuar tre kilometra për të përfunduar në zonën industriale ku edhe janë zbuluar trupat e pajetë.
Megjithatë mbetet mister se nga ku ishin futur në kamionin frigorifer këta persona që kishin humbur jetën. Gjithashtu nuk dihet roli i saktë i shoferit të kamionit në këtë ngjarje të shumë përfolur. Por, edhe pse e kishte vozitur kamionin vetëm pesë minuta, ai ka përfundua në pranga të policisë nën dyshimin për vrasje. /tg
