OSLO (AA) – Ministri i Mbrojtjes i Norvegjisë, Frank Bakke-Jensen, i kërkoi falje Turqisë për skandalin në stërvitjen “Trident Javelin” të NATO-s në Norvegji, raporton Anadolu Agency (AA).
Në një deklaratë me shkrim nga Ministria norvegjeze e Mbrojtjes mbi ngjarjen në stërvitjen e NATO-s, Jensen është shprehur: “Një mesazh u publikua në sistemin e qarkut të mbyllur të përdorur gjatë stërvitjes së NATO-s në Qendrën e Luftimit të Përbashkët në Stavanger të Norvegjisë. Ky mesazh është shkruar nga një shtetas norvegjez i punësuar vetëm për periudhën stërvitore”.
Duke theksuar se mesazhi i shkruar nga qytetari norvegjez nuk reflekton kategorikisht pikëpamjet dhe politikat norvegjeze, Jensen ka deklaruar se: “Kërkoj falje për përmbajtjen e mesazhit. Turqia është një aleat i rëndësishëm i NATO-s dhe ne e vlerësojmë partneritetin tonë të afërt”.
Jensen ka theksuar se shtetasi norvegjez, i cili publikoi mesazhin, është larguar menjëherë nga stërvitja e NATO-s në Qendrën e Luftës së Përbashkët dhe se do të ndërmerren hapat e nevojshme duke kryer një hetim të detajuar mbi incidentin.
