Kancelarja gjermane, Angela Merkel, lidhur me krizën e refugjatëve në Evropë deklaroi se nuk mbështet deklaratat e zyrtarëve të disa vendeve të caktuara të cilët porosisin se muslimanët nuk janë të mirëpritur në shtetet e tyre, raporton Anadolu Agency (AA).
“Nuk më pëlqejnë deklaratat e zyrtarëve në disa vende të cilët flasin se ‘muslimanët nuk mund të hyjnë në vendin tonë”. Kjo për mua është e papranueshme’”, tha Merkel.
Ajo theksoi se deklaratat e tilla nuk janë në pajtim me vlerat themelore evropiane si dhe lirinë e fesë.
Kancelarja gjermane gjatë vizitës në gjimnazin francez në Berlin të martën, ku u shoqërua me nxënësit dhe personelin mësimdhënës, tha se edhe Siria është fqinj i Bashkimit Evropian (BE).
Të pranishmëve u tha se BE-ja, në të cilën jetojnë 500 milionë banorë, ka përgjegjësi të pranojë refugjatë dhe migrantë.
