TAZ: Ku po çon politika përkëdhelëse e BE-së ndaj Serbisë
Bashkimi Evropian, ngjashëm me vitet 1990, drejton një politikë përkëdhelëse ndaj Beogradit dhe ka ende zyrtarë gjermanë dhe evropianë që besojnë se presidenti serb Aleksandar Vuçiç është garantuesi kryesor i stabilitetit të rajonit të Ballkanit Perëndimor dhe për këtë arsye ata duhet ta mbështesin atë, shkruan gazeta gjermane TAZ.
Në shkrimin e autorit, kujtohet se Vuçiç gjatë muajit korrik ka pritur në Beograd kancelarin gjerman Olaf Scholz me një ceremoni madhështore për të arritur një marrëveshje për nxjerrjen dhe eksportin e litiumit nga Serbia në Bashkimin Evropian. Më tej thuhet se të gjitha argumentet e mbështetësve të kësaj “marrëveshjeje të ndyrë” janë ose të dobëta ose të rreme, sepse vetëm një për qind e rezervave botërore të këtij minerali gjendet në Serbi.
“Bashkimi Evropian mund të importojë litium nga demokracitë ‘joproblematike’ si Australia dhe kështu nuk duhet të mbështesë një nga autokratët e fundit agresivë të Evropës. Gjithashtu, Gjermania mund të nxjerrë rezervat e veta të litiumit, por kjo ndoshta nuk do të ishte e mençur nga pikëpamja e ndotjes së mjedisit dhe zgjedhjeve të ardhshme. Nga ana tjetër, Serbia është mjaft larg dhe Berlini duket se është relativisht indiferent ndaj veprimeve të luftëtarëve shumë aktivë dhe të guximshëm për mbrojtjen e mjedisit në Serbi”, vijon artikulli.
Krimet e luftës
Më tej vihet në dukje reagimi interesant i qetë i ambasadorit rus në Serbi, Alexander Bocan Harchenko, kur bëhet fjalë për marrëveshjen gjermano-serbe, i cili tha: “Nuk kam dëgjuar kurrë asgjë nga presidenti i Serbisë, Aleksandar Vuçiç, se mund të na shtyjë të mendojmë se Serbia ndryshon politikën e saj”.
“Mjaft për ata që besojnë se mund t’i blejnë autoritetet serbe… Sikur të mos kishin ndodhur tre luftëra midis 1991 dhe 1999, në të cilat vdiqën 150,000 njerëz dhe u prodhuan katër milionë refugjatë, pikërisht nga paraardhësi dhe ish-shefi i Vuçiçit, presidenti serb Slobodan Millosheviç”, thekson autori dhe vazhdon:
“Po, si në çdo konflikt të armatosur, ka pasur krime lufte nga të gjitha anët. Megjithatë, të gjitha burimet, duke filluar nga OJQ-të që luftojnë për të drejtat e njeriut si Amnesty International dhe Human Rights Watch, e deri te Komisioni i Ekspertëve të OKB-së për Krimet e Luftës dhe CIA amerikane, arrijnë në përfundimin se forcat serbe kanë kryer më shumë se 80 për qind të krimit. Dhe kjo është bërë me qëllim të ‘pastrimit’ të territoreve nën kontrollin serb nga joserbët. Këto ‘spastrime etnike’, të ndjekura nga vrasje masive dhe gjenocid, nuk janë ‘nënprodukt’ i betejave agresive, por qëllimi i tyre”.
Më pas thuhet se administratorët e pjesëve të ish-Jugosllavisë që kontrolloheshin nga serbët ishin “aq mizorë sa që në fund të luftës ato zona ishin 99.9 për qind serbe”.
Sulmet terroriste
“Pothuajse të gjithë joserbët ose u vranë ose u dëbuan, dhe detajet e kësaj mund të gjenden në miliona faqe të gjykatës për krimet e luftës në Hagë – këtë mund ta gjejë kushdo që ende ka disa dyshime për politikën serbe”, shkruan TAZ dhe më pas shtron pyetjen: Pse e gjithë kjo ka rëndësi 30 vjet më vonë?
“Sepse Qeveria e Serbisë në Beograd më në fund filloi të zbatojë planin e Millosheviçit ‘Serbia e Madhe’. Dhe, për ta bërë ironinë edhe më të madhe, ish-ministër i Propagandës së Millosheviçit është sot presidenti i Serbisë, Aleksandar Vuçiç, huliganët e të cilit sulmuan forcat e NATO-s në veriun me shumicë serbe të Kosovës në maj të vitit të kaluar, duke plagosur 90 paqeruajtës”.
Gazeta gjermane kujton edhe ngjarjet e shtatorit kur “një polic i Kosovës dhe tre sulmues serbë u vranë në një sulm të forcave paramilitare serbe”, dhe se si “udhëheqësi Milan Radoiçiç dhe 30 persona arritën të arratisen në Beograd ku jetojnë pa probleme”.
Autori thekson se separatistët serbë e filluan luftën në Kroaci në vitin 1990 dhe në Bosnje-Hercegovinë në vitin 1992 me “sulme terroriste ndaj policëve”.
“Në vitin 1995, Vuçiç u bë popullor kur, gjatë masakrës serbe gjatë gjenocidit të Srebrenicës, ai kërcënoi më 20 korrik në Parlamentin e Beogradit se do të vriste 100 myslimanë për çdo serb të vrarë nga NATO”. /tesheshi.com/
