Më 4 dhjetor studentët në gjithë vendin pritet të nisin protestat masive kundër qeverisë “Rama”, për ligjin e “Arsimit të Lartë”. Lëvizja për Universitetin, organizata rinore që zhvilloi fiks një vit më parë protestat më masive rinore, ka njoftuar sot në mbrëmje nisjen e tubimeve në gjithë vendin.
Të rinjtë që drejtojnë këtë organizatë thonë se studentë kanë kërkesa të qarta kundër qeverisë “Rama” dhe kërkojnë plotësimin e tyre të menjëhershëm.
“Me mijëra në protestë! Më 4 dhjetor, në njëvjetorin e nisjes së protestave madhështore të studentëve, mblidhemi sërish me mijëra në protestë: Kundër; ligjit të arsimit të lartë, financimit të universiteteve private me paratë tona, abuzimit me të drejtat e studentëve”,- thuhet në njoftimin e shpërndarë për gjithë rrjetet studentore në vend.
Studentët kanë renditur një listë me kushte ndaj qeverisë që nisin me; arsim cilësor, ayfishimin e buxhetit të arsimit të lartë, përgjysmimin e të gjitha tarifave, votë të barabartë studentë-pedagogë, kushte dinjitoze studimi dhe jetese, perspektivë punësimi profesional.
Lëvizja për Universitetin në këtë protestë fton gjithë qytetarët që t’u bashkohen kërkesat të të rinjve. “Ne do të fitojmë! Bashkë me studentët, e gjithë shoqëria!”,- njofton Lëvizja për Universitetin.
Një vit më parë, në muajin dhjetor, protestat e studentëve tronditën qeverinë nga masiviteti i tyre dhe për mesazhe e forta që ata dhanë. Gjatë gati një muaji protesta, Edi Rama u detyrua të ndërrojë gjysmën e kabinetit qeveritar nga presioni i të rinjve.
Të rinj nga Lëvizja për Universitetin thonë se këtë vit, protestat do të jenë edhe më të forta, pasi ndjehen të mashtruar nga kryeministri Edi Rama dhe nga mos mbajtja e premtimeve për arsimin.
