E djathta në pushtet shënjestron muslimanët që shtohen e shtohen…
Shqetësimet në mesin e muslimanëve që jetojnë në Itali janë shtuar së fundmi pasi Dhoma e Përfaqësuesve miratoi një projekt-ligj të ri të mërkurën e kaluar që vëzhguesit e përshkruan si “kundër xhamive” për shkak të masave të rrepta që përfshin, të cilat ka të ngjarë të çojnë në mbylljen e shumë ambienteve të lutjeve muslimane(mesxhide) dhe ndalimin ndërtimin e objekteve të reja të kultit në vend.
Projektligji i ri ndalon efektivisht përdorimin e selisë së institucioneve bamirëse dhe organizatave jofitimprurëse si vende kulti për komunitete fetare që nuk kanë kontratë me shtetin, siç është rasti me komunitetet muslimane të përhapura në të gjithë Italinë.
Ka katër xhami të licencuara në Itali, por përveç kësaj ka më shumë se 1300 qendra kulturore islame në vendet që fillimisht ishin të destinuara për funksione të tjera si garazhe makinash, magazina dhe bodrume të pasurive të paluajtshme, dhe tani përdoren si hapësira lutjesh të marra me qira nga muslimanët. Disa janë dhe të blera, si për shkak të vështirësisë në marrjen e lejeve për ndërtimin e xhamive zyrtare e si për shkak të masivitetit në shtimin e besimtarwve, të dizajnuar më pas si xhami. Nuk është diçka e re, ndodh kudo, në Europë e gjetkë. Pra, pwrdorimi i atyre qw ndryshe quhet mesxhide, pra vendfaljeje me rol xhamie, por jo xhami klasike.
Projektligji i paraqitur nga përfaqësuesi Tommaso Foti, kreu i grupit të partisë së djathtë në pushtet Vëllazëria Italiane(Fratelli di Italia), u miratua në parlament me një shumicë votash 135 pro dhe 112 vota kundër.
Ligji do të kalojë në Senat në ditët në vijim për të përfunduar procedurën parlamentare dhe për të hyrë në fuqi.
Miratimi i projektligjit të ri në Kuvend shkaktoi zemërimin e shumë organizatave të të drejtave të njeriut dhe partive opozitare, të cilat vunë në dukje antikushtetutshmërinë e tij dhe e cilësuan atë si diskriminues dhe represiv ndaj Islamit dhe muslimanëve.
Diskriminim antikushtetues
Juristi i specializuar në fushën e së drejtës administrative, Vincenzo Latorraca, vuri në dukje antikushtetutshmërinë e projektligjit të ri sepse shkel nenin 3 të parimit të së drejtës për barazi të parashikuar në kushtetutën italiane.
Latorraca shpjegoi se projektligji vendos diskriminim duke vendosur kufizime veçanërisht për shoqatat që merren me aktivitete fetare, standarde shtesë kufizuese që nuk janë të përcaktuara për objektet e tjera urbane si shkollat, spitalet, gjimnazet dhe qendrat kulturore.
Avokati i tha Al Jazeera-s se në vitin 2019, Gjykata Kushtetuese shfuqizoi një ligj të ngjashëm që synonte të kufizonte hapjen e xhamive të reja në provincën e Lombardisë, sepse ai ligj cenonte lirinë e fesë dhe besimeve fetare të garantuara nga Kushtetuta italiane.
I pyetur nëse ligji i ri do të çojë në mbylljen e ambienteve ekzistuese të lutjeve në Itali, avokati tha se është e vështirë të përcaktohet për shkak të parimit të mosretroaktivitetit të ligjit, i cili do të zbatohet vetëm për rastet pas hyrjes së tij në fuqi.
“Megjithatë, është e sigurt se vendosja e standardeve të tilla strikte do të çojë në vendosjen e kufizimeve serioze në dhënien e lejeve të reja për objektet e kultit dhe xhamitë në vend”, shtoi ai.
Politika e margjinalizimit
Megjithëse muslimanët në Itali janë bërë një komunitet i rëndësishëm për nga madhësia, me rreth 2.7 milionë njerëz, përfshirë 1.7 milionë që kanë nënshtetësi italiane, ata ende përballen me probleme të shumta në nivele të ndryshme, më të rëndësishmet prej të cilave janë margjinalizimi, diskriminimi dhe mungesa e përfaqësimit politik në agjencitë qeveritare.
Kreu i partisë Europa e Gjelbër, Angelo Bonelli, në një intervistë për Al Jazeera-n, thotë se projektligji i ri është antikushtetues, sepse shkel nenin 19, i cili parashikon të drejtën e një individi për të ushtruar ritet fetare me liri të plotë, për t’i praktikuar ato fshehurazi ose publikisht, me kusht që të mos jetë në kundërshtim me zakonet pozitive.
Ai shtoi se projektligji i propozuar konsiderohet si rezultat i politikës së margjinalizimit dhe diskriminimit të kryer nga partitë e djathta ndaj komuniteteve muslimane, të cilat nëse ligji hyn në fuqi, nuk do të mund të ushtrojnë të drejtën e tyre për adhurim në vende ku lejohen fetë e tjera.
Bonelli vuri në dukje se partitë e krahut të djathtë shpesh i lidhin muslimanët me terrorizmin, emigrantët dhe krimin, “dhe ky është një gabim i pafalshëm, i ndërtuar mbi gënjeshtra dhe në fakt synon të krijojë panik dhe frikë në popullatë për të arritur një konsensus për këtë çështje”.
Ai theksoi synimin e partisë së tij që së shpejti ta paraqesë projektligjin në Gjykatën Kushtetuese në mënyrë që ai të shfuqizohet.
Frikë në rritje
Në kontekstin e rritjes së frikës dhe ndjenjës së humbjes së të drejtave mes muslimanëve në Itali, kreu i Unionit të Komuniteteve Islame, Yassine Lafram, në një intervistë për Al Jazeera-n, e cilësoi projektligjin e ri si të padrejtë ndaj muslimanëve, duke qenë se ai bazohet në diskriminimin fetar dhe sulmon të drejtën e tyre për të praktikuar lirisht ritet e tyre fetare.
Lafram theksoi se vështirësitë reale me të cilat përballen komunitetet muslimane rrjedhin nga politikat e shumë qeverive lokale të udhëhequra nga partitë e djathta ekstreme, të cilat në fushatat e tyre zgjedhore fokusohen në domosdoshmërinë e mbylljes së xhamive të palicensuara dhe frenimit të muslimanëve, gjë që rrit ndjenjat e urrejtjes dhe ekspozon muslimanët ndaj sulmeve, sidomos ndaj grave, jo vetëm verbalisht, por edhe fizikisht.
Lideri i Unionit të Bashkësive Islame tha: “Edhe pse kemi qenë gati 35 vjet, si institucion përfaqësues i muslimanëve në vend, të nënshkruajmë një marrëveshje me qeverinë në përputhje me nenin 8 të Kushtetutës, ishte e pamundur për shkak të për mungesën e vullnetit politik në të gjitha qeveritë e njëpasnjëshme gjatë viteve të fundit”.
Imami i xhamisë fiorentine, Ezzedine Al-Zeer, tha se ligji i ri bart erën e racizmit dhe urrejtjes ndaj Islamit dhe muslimanëve.
“Është e vërtetë që kushtetuta përshkruan domosdoshmërinë e respektimit të feve, por miratimi i ligjeve të tilla e bën jashtëzakonisht të vështirë ose madje të pamundur kryerjen e lutjeve dhe ceremonive të tjera fetare,” tha ai për Al Jazeera-n.
Ai theksoi rëndësinë e të drejtave të muslimanëve, duke thënë: “Ne duam t’i kryejmë aktivitetet tona brenda një kornize të drejtë ligjore dhe shteti duhet të na sigurojë vendet e përshtatshme për të kryer ceremonitë tona fetare”.
Zyrtarja e Amnesty International në Itali, Tina Marinari, tha se në vend të këtyre përpjekjeve për ndalimin e xhamive, duhet të ndërmerren hapa për të arritur një marrëveshje midis shtetit italian dhe komuniteteve islame për të inkurajuar ndërtimin ligjor të xhamive.
“Bashkësia islame në Itali ekziston dhe është e rëndësishme që, si të gjitha grupet e tjera fetare, ne t’i garantojmë lirinë e fesë siç përcaktohet nga kushtetuta jonë,” tha ajo në një intervistë për Al Jazeera-n.
Kjo aktiviste e të drejtave të njeriut beson se diskriminimi pret zemrën dhe dëmton të drejtat e njeriut thjesht për shkak të identitetit ose besimit të tyre, ndërkohë që mbështet pabarazinë mes njerëzve. /tesheshi.com/
