Ministri i Punëve të Jashtme të Rusisë, Sergey Lavrov, më 1 dhjetor do të realizojë në Turqi vizitën e anuluar për shkak të krizës së avionit në 24 nëntor të vitit të kaluar.
Zëdhënësja e Ministrisë së Jashtme ruse, Maria Zaharova, në konferencën javore të shtypit tha se më 1 dhjetor ministri i Jashtëm Lavorv do të vizitojë qytetin Alanya për të marrë pjesë në mbledhjen e Grupit të Planifikimit të Përbashkët Strategjik Turko-Rus.
Zaharova sqaroi se kjo mbledhje do të realizohet për herë të parë pas rrëzimit si sot një vit më parë nga gjuajtësit turq F-16 të avionit rus të tipit Su-24.
Në takimin e Alanya-s, vijoi zëdhënësja përveç marrëdhënieve dypalëshe do të trajtohen edhe zhvillimet aktuale, problemet rajonale dhe ndërkombëtare.
Pjesë e agjendës së mbledhjes do të jetë edhe situata në Siri. Gjithashtu do të bisedohet për mundësitë e rritjes së efektivitetit të luftës kundër terrorizmit ndërkombëtar, tha Zaharova, ndërsa shtoi se pala ruse ka dëshirë për rikthimin e marrëdhënieve me Turqinë në nivelin e dikurshëm, vetëm se ky proces kërkon kohë, u shpreh ajo.
“Prishja e marrëdhënieve është shumë e lehtë, kurse ndreqja e tyre është e vështirë. Shumë probleme të reja u shtuan edhe në periudhën e krizës, pas rrëzimit të avionit tonë. Të gjitha këto duhen zbardhur dhe zgjidhur në mënyrë graduale”, nënvizoi zëdhënësja e Ministrisë së Jashtme ruse, Maria Zaharova.
