Vendi nordik nuk pranon pretendimet e Moskës mbi librin e shenjtë islam
Autoritetet suedeze kanë akuzuar Rusinë se po përpiqet të ndikojë se si djegia e Kuranit shihet në mbarë botën përmes fushatave dezinformuese të shkruara në arabisht, me qëllim që të rrezikojnë anëtarësimin e Suedisë në NATO.
Agjencia Suedeze për Mbrojtjen Psikologjike, pjesë e Ministrisë së Mbrojtjes, tha se media shtetërore ruse RT dhe Sputnik publikuan një seri artikujsh në arabisht, duke pretenduar rrejshëm se qeveria suedeze mbështet djegien e Kuranit, raporton The Guardian.
Sipas raportimeve, që nga fundi i qershorit, autoritetet kanë regjistruar rreth një milion tekste të ngjashme në arabisht dhe gjuhë të tjera.
Zëdhënësi i Agjencisë së Mbrojtjes Psikologjike, Mikael Ostlund tha se dezinformatat në internet janë rritur në mënyrë eksponenciale që kur dy irakenë dogjën një Kuran jashtë një xhamie në Stokholm në festën myslimane të Kurban Bajramit në qershor.
Mes atyre që përhapin lajme të rreme, tha ai, ishin disa shtete dhe disa ekstremistë.
“Ata përsërisin histori se Suedia mbështet djegien e Kuranit dhe se është një vend islamofobik dhe armik i Islamit,” tha ai, duke shtuar se kjo e bën të vështirë për vendin anëtarësimin në NATO.
Sipas tij, fakti që qëndrime të tilla janë përcjellë nga mediat shtetërore tregon se “kjo strategji vjen nga lart dhe është miratuar nga Kremlini”.
“Ndërsa modeli i dezinformimit zhvillohet me kalimin e kohës, bëhet më e lehtë për njerëzit të besojnë se historitë e rreme janë të vërteta,” shtoi ai.
Valentina Shapovalova, një studente doktorature në Universitetin e Kopenhagës, e cila studion propagandën dhe dezinformimin rus, tha se djegia e Kuranit në Suedi ishte “e vështirë për t’u shmangur” në mediat ruse, të cilat raportonin mbi këtë temë pothuajse çdo ditë.
“Rusia definitivisht po përpiqet të përdorë djegien e Kuranit në narrativën e saj propagandistike, e cila është ndërtuar rreth idesë se, në përgjithësi, vlerat perëndimore dhe perëndimore janë të korruptuara dhe se Perëndimi është në proces kalbjeje,” tha ajo.
Siç deklaroi ajo, në disa storje mediatike, djegia e Kuranit u përdor si konfirmim se bota liberale perëndimore kishte shkuar shumë larg.
Dy irakianët, Salwan Momika dhe Salwan Najem, iu dha leje për të djegur Kuranin para parlamentit, gjë që shkaktoi zemërim dhe intensifikoi më tej krizën diplomatike midis Suedisë dhe vendeve myslimane në mbarë botën.
Qeveria e Suedisë është nën presionin global në rritje për të parandaluar protesta të mëtejshme, por deri më tani ka përjashtuar ndryshimin e ligjeve sistematike të lirisë së shprehjes në vend. /tesheshi.com/
