Kolegji gjyqësor prej tre gjyqtarësh i Gjykatës së Apelit ka anuluar një vendim të Gjykatës Themelore në Pejë, të datës 21.06.2016, në bazë të të cilit ishte refuzuar kërkesa e prokurorisë për ekstradimin e shtetasit britanik, A. Ch. K. S.
Gjykata e Apelit e Kosovës thotë se çështja i është kthyer serish të njëjtës gjykatë për rivendosje ndërsa të kërkuarit i është vazhduar paraburgimi.
Sipas Gjykatës së Apelit, personi në fjalë po kërkohet nga ana e Britanisë se Madhe për shkak të dyshimit të bazuar se “ka kryer dy vepra penale marrëdhënie seksuale anale në kundërshtim me nenin 12 (1), të Ligjit mbi Krimet Seksuale të Anglisë (1956), gjashtë vepra penale sulm i pahijshëm mbi një person mashkull, nga neni 15(1) i të njëjtit ligj, si dhe imoralitet me një fëmijë, nga neni 1 i Ligjit mbi Imoralitetin me fëmijë (1960)”.
“Gjykata e Apelit gjeti se ankesa e prokurorisë kundër aktvendimit të shkallës së parë është e bazuar. Kjo për faktin se vendimi në fjalë nuk është i bazuar, ngase aplikimi i ligjit penal vendor është i gabuar, dhe nuk janë dhënë arsye të qarta sa i përket skadimit të afatit të parashkrimit të veprave penale, për të cilat po kërkohet shtetasi britanik”, theksohet në komunikatën e Gjykatës së Apelit të Kosovës.
Më tej potencohet se në procedurë të rivendosjes, Gjykata Themelore duhet të jep arsye të qarta se sipas cilit ligj vendor parashihen këto vepra penale “duke i pasur parasysh ndryshimet e disahershme të Kodit penal dhe pastaj për secilën vepër veç e veç të përcaktoj se a ka skaduar afati i parashkrimit që nga koha e kryerjes së tyre”.
