Vendi nordik, me standart jetese por dhe me urrejtje njerëzore
Xhamia në ndërtim e komunitetit boshnjak në qytetin suedez të Norrkoping ishte objektiv i një sulmi gjatë të cilit u thyen xhamat dhe u shkruan mesazhe fyese në muret e saj.
Haris Deliç, anëtar i Këshillit Ndërfetar të Suedisë, ka publikuar një deklaratë në profilin e tij në Facebook, në të cilën ka thënë se ata “dënojnë sulmin e tmerrshëm”.
“Me tmerr të madh dhe pikëllim të thellë, ne dënojmë sulmin e urryer në ndërtesën e xhamisë sonë në Norrköping, ku u thyen xhamat dhe u shkruan mesazhe fyese në mure.
Ky veprim sjell kujtime të pakëndshme nga koha kur shumë nga anëtarët tanë erdhën në Suedi si refugjatë gjatë luftës në Bosnje. Mesazhet që na dërgohen tani janë të ngjashme me sloganet neonaziste që hasnin atëherë. Ne e shohim këtë sulm si një sulm jo vetëm ndaj vendit tonë të shenjtë dhe komunitetit tonë, por edhe ndaj vlerave themelore të të gjithë shoqërisë suedeze për respektin, tolerancën dhe diversitetin. Ky është krimi i dytë i madh i urrejtjes kundër xhamive dhe komunitetit dhe anëtarëve të tij brenda një kohe të shkurtër dhe ne po përjetojmë një rritje të përgjithshme të ndjenjave islamofobike në shoqëri.
Prandaj, ne po i kërkojmë drejtpërdrejt qeverisë që të bëjë më shumë për të mbrojtur lirinë fetare në Suedi. Në kohë polarizimi dhe rritje të fushatave të urrejtjes si kjo, ne presim që qeveria të veprojë më me vendosmëri dhe të intensifikojë punën e sigurisë me komunitetet fetare.
Ne duam të bëjmë të qartë se ky akt urrejtjeje nuk do të na nënshtrojë apo na thyejë shpirtin. Përkundrazi, forcon vendosmërinë tonë për të vazhduar përfundimin e ndërtimit të xhamisë sonë dhe për ta bërë atë të hapur për të gjithë banorët e Norrkopingut. Gjithashtu duam të shprehim mirënjohjen tonë më të thellë për të gjithë ata që kanë treguar mbështetje dhe solidaritet në këtë moment të vështirë. Fjalët dhe veprimet tuaja të ngrohta na kujtojnë se nuk jemi vetëm në luftën kundër urrejtjes dhe fanatizmit”.
Komuniteti e raportoi incidentin në polici, sipas mediave suedeze. /tesheshi.com/
