Kryeimami Sahiti priti në takim znj. Ibadete Krasniqi drejtoreshë e Organizatës për fëmijët pa kujdes prindëror OFAP
Kryeimami i Bashkësisë Islame të Kosovës, Vedat ef. Sahiti, bashkë me zyrtaret e Departamentit të Gruas së BIK-ut, mirëpriti në takim znj. Ibadete Krasniqi drejtoreshë e Organizatës për fëmijët pa kujdes prindëror OFAP, e cila shoqërohej nga znj. Lule Beka.
Kryeimami Sahiti e falënderoi znj. Krasniqi për kontributin e organizatës OFAP në ndihmë të fëmijëve pa kujdes prindëror, si dhe çmoi lart rolin e kësaj organizate në gjetjen e familjeve strehuese për këta fëmijë.
Ai gjithashtu theksoi gatishmërinë e Bashkësisë Islame të Kosovës që të bashkëpunojë dhe të ndihmojë përmes skemave të saj sociale në projekte konkrete.
Nga ana e saj, znj. Ibadete Krasniqi, falënderoi kryeimamin për mikpritjen dhe për gatishmërinë e tij për bashkëpunim edhe përmes Departamentit të Gruas dhe Shoqatës Humanitare “Bereqeti” që të bashkërendojnë aktivitetet në projekte të ndryshme që t’u dalin në ndihmë fëmijëve pa kujdes prindëror, dhe atyre që kanë nevojë për kujdesin tonë si shoqëri.
