Më shumë se 30 ushtarë paqeruajtës të NATO-s që janë plagosur në tri komunat në veri të vendit në përleshjet me protestuesit serbë, ndërsa presidenti i Serbisë e vendosi ushtrinë në nivelin më të lartë të gatishmërisë luftarake.
Kështu e fillon shkrimin mediumi prestigjioz britanik “The Guardian”, sipas të cilit, situata e tensionuar u zhvillua pasi kryetarët shqiptarë etnikë morën detyrën në zonën me shumicë serbe në veri të Kosovës pas zgjedhjeve që serbët i bojkotuan.
Mediumi në fjalë kujton edhe faktin se ky veprim i Prishtinës u kritikua nga SHBA dhe aleatët e saj.
Megjithatë, thekson mediumi britanik, KFOR-i, misioni paqeruajtës i NATO-s në Kosovë dënoi dhunën e ushtruar nga protestuesit serbë, nga e cila si pasojë edhe u lënduan disa ushtarë të KFOR-it.
“Komandanti i KFOR-it, gjenerali i divizionit Angelo Michele Ristuccia, i kritikoi sulmet si ‘të papranueshme’ dhe nënvizoi se misioni i NATO-s ‘do të vazhdojë të përmbushë mandatin e saj në mënyrë të paanshme’”, shkruan ndër tjerash The Guardian, përcjell Telegrafi.
Por ky nuk është i vetmi medium botëror që ka raportuar për zhvillimet e fundit në veri të Kosovës.
“NATO dënon përleshjet në Kosovë, 25 trupa të KFOR-it të plagosur, 3 në gjendje kritike”, është titulli i Euronews, përcjell Telegrafi.
Një vëmendje të veçantë këtyre zhvillimeve i ka dhënë edhe “Al Jazeera”, që ndër të tjera sjellë deklaratën e presidentes së Kosovës, Vjosa Osmani, e cila akuzoi homologun e saj serb Aleksandar Vuçiq për destabilizimin e Kosovës.
“Strukturat ilegale serbe të kthyera në banda kriminale kanë sulmuar policinë e Kosovës, oficerët e KFOR-it dhe gazetarët. Ata që zbatojnë urdhrat e Vuçiqit për të destabilizuar veriun e Kosovës, duhet të përballen me drejtësinë”, kishte shkruar Osmani në Twitter.
Ndërsa “Sky News” ka publikuar pamje nga veriu i Kosovës duke theksuar se “dhuna ishte incidenti i fundit pasi tensionet u rritën gjatë javës së kaluar, me Serbinë që vendosi ushtrinë e vendit në gatishmëri të lartë dhe dërgoi më shumë trupa në kufirin me Kosovën”.
Ndërkohë, përveç CNN, edhe “Trt World” ka vënë në pah faktin se “dhjetëra trupa të NATO-s janë dislokuar në veri të Kosovës ndërsa serbët etnikë u mblodhën sërish përpara një bashkie në Zveçan pas përleshjeve të dhunshme me paqeruajtësit që lanë 30 ushtarë të plagosur”.
“Ushtarët e Forcave të Kosovës (KFOR) të udhëhequra nga NATO, të veshur me pajisje të plota kundër trazirave kanë vendosur një pengesë metalike rreth ndërtesës komunale në Zveçan dhe po ndalojnë disa qindra serb etnikë të hyjnë, sipas një gazetari të AFP”, shkruan ky medium.
Ndryshe, grupe kriminale serbe kanë sulmuar të hënën ushtarët e KFOR-it në protestat e organizuara në veri të vendit.
Protesta ishte e dhunshme dhe u dënua nga BE, NATO, SHBA, Britani e Madhe, Franca e Zvicra.
Si pasojë e dhunës nga protestuesit serbë, 30 ushtarë të KFOR-it u lënduan, ndërkaq u penguan dhe u sulmuan edhe ekipet e mediave. Gjithashtu, protestuesit dogjën dhe sulmuan veturat e mediave.
Në protestë fillimisht ishin zyrtarët e Listës serbe, por ata nuk u mirëpritën nga organizatorët e protestave, të cilët u thanë atyre se nuk janë përfaqësues të popullit dhe për fajin e tyre serbët po ikin nga veriu i Kosovës. /Telegrafi/
