U deshën 20 vjet: ilaçi që shkatërron të gjitha llojet e tumoreve të ngurta
Shkencëtarët kanë bërë përparim të rëndësishëm në trajtimin e kancerit me zhvillimin e një ilaçi revolucionar të koduar AOH1996. Kjo molekulë synon një proteinë të njohur si antigjen bërthamor i qelizave proliferuese (PCNA), e cila është e pranishme në shumicën e qelizave kancerogjene dhe nxit rritjen dhe riprodhimin e tyre.
Ilaçi i zbuluar, më parë konsiderohej i pamundur për t’u zhvilluar, sepse PCNA konsiderohej “i patrajtueshëm”. Megjithatë, pas 20 vjet kërkimi dhe zhvillimi në Spitalin City of Hope në Los Angeles, një nga qendrat më të mëdha të trajtimit të kancerit në Amerikë, ata krijuan me sukses AOH1996, raporton Daily Mail.
Efektiviteti i ilaçit është testuar në më shumë se 70 lloje të ndryshme të qelizave kancerogjene, duke përfshirë ato nga gjiri, prostata, truri, vezoret, qafa e mitrës, lëkura dhe mushkëritë, dhe është treguar të jetë jashtëzakonisht efektiv kundër të gjithave.
Përveç kësaj, AOH1996 synon në mënyrë selektive qelizat e kancerit duke ndërprerë ciklin e tyre normal riprodhues. Ai parandalon ndarjen e qelizave me ADN të dëmtuar dhe ndalon riprodhimin e ADN-së me të meta, duke rezultuar në vdekjen e qelizave kancerogjene e lënë qelizat e shëndetshme të paprekura.
Dr. Linda Malkas, e cila drejton ekipin hulumtues në Spitalin City of Hope, shpjegoi se ilaçi në mënyrë specifike ndërhyn në replikimin dhe riparimin e ADN-së në qelizat e kancerit, duke mbrojtur kështu qelizat e shëndetshme nga dëmtimi.
Ndryshe nga shumë terapi të synuara që fokusohen në një rrugë të vetme, AOH1996 synon një formë unike të PCNA-së të pranishme në qelizat e kancerit, duke e bërë atë jashtëzakonisht premtuese në shtypjen e rritjes së tumorit pa efekte anësore negative. Ilaçi aktualisht po i nënshtrohet provave klinike të fazës 1 tek njerëzit në spitalin City of Hope.
Zhvillimi i kësaj terapie të re sjell shpresë se kanceri mund të bëhet i shërueshëm brenda dekadës së ardhshme.
Nisma “Cancer Moonshot” e Presidentit Joe Biden, e rifilluar në vitin 2022, synon gjithashtu të reduktojë ndjeshëm vdekjet nga kanceri gjatë 25 viteve të ardhshme.
Hulumtimi, i botuar në revistën Cell Chemical Biology, përfaqëson një hap të rëndësishëm përpara në trajtimin e kancerit dhe përfaqëson një përparim të mundshëm në terapitë e personalizuara dhe të synuara. Studiuesit tani po kërkojnë të kuptojnë më mirë mekanizmin e veprimit të ilaçit për të përmirësuar provat aktuale klinike njerëzore. /tesheshi.com/
