Drejtori i Forumit për Marrëdhënie Ndëretnike në Serbi, Dushan Janjiq, ka thënë se pushteti në Serbi po e kupton se ky është fundi i epokës së Sllobodan Millosheviqit dhe se kanë shumë për të humbur, por me metodat që përdorin përshpejtojnë fundin e tyre dhe, sipas tij, më e keqja është se po shkaktojnë dëme në njerëz dhe materiale.
“Kjo është hera e parë që një grup personash me ‘koktej molotovi’, të stërvitur për të luftuar dhe sulmuar ushtarët, befas dalin nga një protestë e organizuar. Kjo ndodhi sepse që nga mëngjesi në media është interpretuar se KFOR-i ka pajisje për të shpërndarë demonstratat për të rrahur serbët. Ata nuk e kuptojnë se kur ushtria pajiset në këtë mënyrë ka një detyrë shtesë, dhe detyra ishte që KFOR-i të siguronte tërheqjen nëse ka marrëveshje për tërheqjen e kryetarit dhe forcave policore”, tha Janjiq, për Al Jazeera, transmeton Telegrafi.
Janjiq pyet dhe tregon se kush po i udhëheq njerëzit në protestat në veri të Kosovës.
“Formalisht ata i udhëheq Lista Serbe. Ka gjithashtu përfshirje të ngathët dhe të drejtpërdrejtë të autoriteteve dhe disa shërbimeve. Ata duhet të ndalojnë atë lojë që e kanë trashëguar nga periudha e Millosheviqit. Ata e kuptojnë se ky është fundi i epokës së Millosheviqit dhe se kanë shumë për të humbur, por metodat që po përdorin po e përshpejtojnë fundin e tyre. Çka është më e keqja, ata shkaktojnë dëme njerëzore dhe materiale, si dhe dëme politike për qytetarët e Kosovës dhe Serbisë”, tha ai. /Telegrafi/
