Rivalët e Kryeministrit izraelit Benjamin Netanyahu, Partia “Yesh Atid” (Ardhmëria Ekziston) dhe partitë e opozitës të drejtuara nga Partia “Yamina” kanë rënë dakord të formojnë një qeveri koalicioni.
Yair Lapid, udhëheqësi i Partisë “Ardhmëria Ekziston” i ngarkuar me formimin e koalicionit pas dështimit të Kryeministrit Netanyahu, i tha Presidentit Reuven Rivlin se ai kishte arritur numrin për të formuar qeverinë.
Presidenti Rivlin përgëzoi Lapidin dhe liderët e partive të përfshira në koalicion në llogarinë e tij në Twitter.
Tetë parti do të jenë në qeverinë e koalicionit të udhëhequr nga Naftali Bennett, udhëheqësi i partisë së ekstremit të djathtë “Yamina” dhe Yair Lapid udhëheqësi i Partisë “Ardhmëria Ekziston”.
Qeveria e koalicionit e formuar për të hequr Netanyahun duhet të marrë votëbesimin në Parlament dhe të betohet më së voni deri në 14 qershor.
Nëse formohet qeveria e koalicionit, udhëheqësi i Partisë “Yamina” Bennett do të shërbejë si Kryeministër për dy vitet e para si pjesë e marrëveshjes dhe do t’i dorëzojë postin udhëheqësit të partisë “Ardhmëria Ekziston” Lapid për dy vitet e ardhshme.
Nëse qeveria e koalicionit e udhëhequr nga Bennett-Lapid merr votë besimin në Parlament brenda një periudhe të caktuar, mandati i Netanyahu, i cili ka qenë Kryeministër në Izrael që nga marsi 2009, do të përfundojë.
