Rritja e dezinformatave, propozim për edukimin e lexuesit mediatik
Federata Evropiane e Gazetarëve (EFJ) ka paralajmëruar se inteligjenca artificiale po përdoret gjithnjë e më shumë për të prodhuar përmbajtje mashtruese vizuale dhe tekstuale, me qëllim të përhapjes së dezinformatave që do të ndikonin në opinionin publik.
Prandaj, siç theksohet nga EFJ, është më e nevojshme se kurrë që publiku të zhvillojë shkrim-leximin mediatik në mënyrë që të njohë dezinformatat duke përdorur teknika dhe mjete të ndryshme dhe të kuptojë funksionimin e medias.
“Inteligjenca artificiale i bën mjete të fuqishme të disponueshme për të gjithë, duke përfshirë edhe aktorët keqdashës. Kjo është arsyeja pse është e rëndësishme që shkrim-leximi mediatik të shihet si një grup mjetesh dhe teknikash që u mundësojnë përdoruesve të njohin dezinformatat dhe të interpretojnë përmbajtjen mediatike”, sipas EFJ.
Në periudhën e ardhshme, sipas EFJ, Komuniteti Evropian për Inteligjencën Artificiale, të Dhënat dhe Robotikën duhet të bisedojë me sindikatat dhe shoqatat e gazetarëve për hartimin dhe zhvillimin e mjeteve të inteligjencës artificiale që do të lehtësonin punën e punonjësve të medias.
“Bashkëpunimi i institucioneve të ndryshme, zhvilluesve, qeverive dhe botuesve dhe redaktorëve të mediave është i domosdoshëm. Është përgjegjësi e redaksive të sigurojnë që mjetet e inteligjencës artificiale të përdoren në përputhje me standardet gazetareske”, shtoi Federata Evropiane e Gazetarëve. /tesheshi.com/
