Kreu i Islamit në Turqi, gjuhë ashpër dhe ndaj alkoolit, drogës, bixhozit, prostitucionit e homoseksualitetit

Kreu i Islamit në Turqi, Ali Erbas, u shfaq në predikimin e tij të sotëm në Hagia Sophia kundër sjelljeve dhe festimeve që, siç pretendoi ai, nuk janë në përputhje me vlerat e Islamit.

Njeriu që drejton jetën islame në vendin që dikur qe një ndër perandoritë më te fuqishme të botës, për gati pesë shekuj, u bëri thirrje myslimanëve të shmangin praktikat që konsiderohen mëkatare dhe kundër fesë, duke iu referuar zakoneve pagane të festimeve të Vitit të Ri. Ai e bëri këtë dhe në emër të Jezuit, Isait në Islam, këto ditë kur të krishterët kremtojnë Krishtlindjen e pretenduar.

“Të imitosh figura nga traditat që nuk kanë lidhje me fenë dhe kulturën tonë, të vishesh dhe të sillesh si ato, është në kundërshtim me besimin tonë dhe është gabim. Gjëja më absurde është se lindja e një Profeti festohet në një mënyrë që kundërshton vlerat që ai solli. Prandaj, çdo lloj argëtimi dhe sjellje që shkel rregullat e lejueshmërisë dhe privatësisë është kundër besimit tonë dhe është mëkat”, tha ai.

Erbas vijoi dhe me vese si alkooli, bixhozi, prostitucioni, homoseksualiteti, droga, llotaritë dhe bixhozi. “Ato nuk mund të bëhen kurrë të lejueshme apo të ligjshme përmes ndonjë festimi, duke përfshirë festimet e Vitit të Ri”, tha ai.

Ali Erbas u bëri thirrje besimtarëve që të tregojnë përkushtim ndaj vlerave të tyre, hem fetare e hem kombëtare dhe shpirtërore. “Kombet që zëvendësojnë vlerat e tyre me ato të të tjerëve dhe përvetësojnë simbolet e kulturave të tjera nuk mund të qëndrojnë gjatë. Shoqëritë që harrojnë kulturën e tyre dhe i nënshtrohen ndikimit të kulturave të huaja humbasin historinë, gjuhën, fenë dhe identitetin e tyre.

Siç ka paralajmëruar Profeti ynë Muhamedi (paqja dhe bekimet e Allahut qofshin mbi të!), ‘kush i ngjan një populli ai është pjesë e tij’”. /tesheshi.com/