Klipi i kritikueshëm vetëm me fëmijë të bardhë
Në 24 orët e fundit, qeveria franceze ka qenë nën kritika të ashpra për një video që publikoi për të përkujtuar 60-vjetorin e fjalimit historik të Martin Luther King-ut – “Unë kam një ëndërr”. Arsyeja e reagimit është se klipi i shkurtër i postuar nga Ministria e Arsimit në ditën e përvjetorit – dhe më pas i detyruar të fshihet – tregon vetëm… fëmijë të bardhë.
Aktivisti amerikan për të drejtat civile Martin Luther King e kishte mbajtur këtë fjalim në Demonstratën e Uashingtonit për Punë dhe Liri më 28 gusht 1963, duke bërë thirrje për t’i dhënë fund racizmit në SHBA, në mënyrë që të gjithë qytetarët të mund të gëzojnë një ditë të njëjtat të drejta civile dhe ekonomike.
Qeveria franceze donte të përdorte “zëra të rinj” për të shënuar përvjetorin e fjalimit të njohur si “Unë kam një ëndërr”, për shkak të frazës ikonike të përdorur disa herë nga aktivisti për të përshkruar vizionin e tij për një botë të barazisë.
Sipas Daily Mail, megjithatë, klipi u kritikua shumë në mediat sociale, pasi vetëm fëmijët e bardhë duket se përshkruajnë në anglisht “ëndrrën” e tyre për të ardhmen.
Disa komentues e quajtën videon, e cila nuk shfaqte asnjë përfaqësim të komunitetit të zi, të kundërshtueshme, me një kritik që e quajti nismën e qeverisë një “shaka të modës së vjetër të 1 prillit”.
Ministria e Arsimit e Francës lëshoi një sqarim pas postimit të klipit në X (ish-Twitter), duke thënë se fëmijët në video ishin fituesit e një konkursi për përdorim krijues të gjuhës angleze. Pra, përzgjedhja e tyre është bërë në bazë të këtij dallimi, dhe jo ngjyrës së lëkurës së tyre.
“Për të nderuar kujtimin e Martin Luther King-ut, ne kërkuam që fëmijët, me rastin e 60-vjetorit të fjalimit të tij, të frymëzohen nga shprehja “Unë kam një ëndërr” dhe të mbajnë një fjalim të shkurtër”, tha ministri i ri i Arsimit, Gabriel Atal.
Franca është akuzuar shumë herë në të kaluarën për diskriminim të grupeve minoritare, duke përfshirë qytetarët me origjinë afrikane dhe karaibe.
Më herët gjatë verës, në vend shpërthyen protesta masive pas vrasjes fatale të një adoleshenti franko-algjerian nga një oficer policie në Paris, një incident që për shumë karakterizon sjelljen raciste të autoriteteve franceze ndaj të rinjve që nuk kanë lëkurë të bardhë. /tesheshi.com/
