– Rabini ekstremist Glick, i cili kryesoi grupin fanatik hebre gjatë bastisjes, mbajti një fjalim provokues për Xhaminë Al-Aksa
KUDS (AA) – Një grup hebrenjsh fanatikë, të shoqëruar nga rabini dhe ish-deputeti ekstremist i Partisë Likud, Yehuda Glick, dhe nën mbrojtjen intensive të policisë izraelite, bastisën Xhaminë Al-Aksa, transmeton Anadolu.
Sipas agjencisë zyrtare palestineze WAFA, hebrenjtë fanatikë hynë në Harem Al-Sharif përmes portës Megaribe nën mbrojtjen e shumë policëve izraelitë.
Rabini ekstremist Glick, i cili kryesoi grupin fanatik hebre gjatë bastisjes, mbajti një fjalim provokues për Xhaminë Al-Aksa.
– Shkelje e sovranitetit të Administratës së Vakëfeve Islame të Kudsit
Sipas marrëveshjes së paqes të nënshkruar midis Izraelit dhe Jordanisë më 26 tetor 1994, Mesxhid Al-Aksa dhe dhe vakëfet në Kuds janë nën kujdesin e Administratës së Vakëfeve Islame të Kudsit, e cila vepron nën Ministrinë jordaneze të Vakëfeve, Çështjeve Islame dhe Shenjtërisë.
Hebrenjtë, të cilët më parë vizitonin Xhaminë al-Aksa me lejen e Administratës së Vakëfeve Islame, që nga viti 2003, me një vendim të njëanshëm të Izraelit, shkelin sovranitetin e këtij institucioni duke hyrë në faltoren e muslimanëve pa leje dhe nën mbrojtjen e policisë izraelite.
Administrata e Vakëfeve Islame të Kudsit, e cila nuk e njeh këtë vendim të njëanshëm nga autoritetet izraelite, i përshkruan si “bastisje” hyrjet e tilla që cenojnë sovranitetin e muslimanëve.
Mesxhid Al-Aksa, që gjendet në Kudsin Lindor të pushtuar, është kibla e parë e muslimanëve.
Hebrenjtë po kryejnë gërmime në këtë kompleks nën pretendimin aty gjendej i ashtuquajturi “Tempulli i Solomonit”.
Izraeli pushtoi Kudsin Lindor, ku ndodhet Al-Aksa, gjatë Luftës Arabo-Izraelite të vitit 1967. Më pas aneksoi gjithë qytetin në vitin 1980, në një veprim që nuk u njoh kurrë nga komuniteti ndërkombëtar.
