Është rritur në 1.297 numri i personave që kanë humbur jetën dhe mbi 2.700 numri i të plagosurve si pasojë e tërmetit prej 7.2 ballë që goditi të shtunën brigjet e Haitit, transmeton Anadolu Agency (AA).
Zyrtarët njoftuan se në vend është përjetuar një shkatërrim i madh dhe se janë në vazhdim punimet e kërkim-shpëtimit nën rrënoja.
Agjencia e Mbrojtjes Civile e Haitit theksoi se është rritur në 1.297 numri i personave që kanë humbur jetën dhe mbi 2.700 numri i personave të plagosur si pasojë e tërmetit.
Administrata e vendit e cila u përball me një shkatërrim dhe tronditje të madhe i ka bërë thirrje për ndihmë komunitetit ndërkombëtar.
Shërbimi Gjeologjik Amerikan (USGS) kishte njoftuar se epiqendra e tërmetit 7.2 ballë ishte 12 kilometra në verilindje të rajonit Saint-Jean-du-Sud.
Pas tërmetit që u ndje në kryeqytetin Port-au-Prince të Haitit, popullata doli në rrugë në panik.
USGS pas një kohe tërhoqi paralajmërimin për cunami të cilin e bëri pas tërmetit të regjistruar në një thellësi prej 10 kilometrash.
Në rajon u dërguan ekipe për punimet e kërkim-shpëtimit.
Kryeministri i Haitit, Ariel Henry në një deklaratë informoi se në tërmet ishin shkaktuar dëme me përmasa të gjera.
Po ashtu ai njoftoi shpalljen e gjendjes së jashtëzakonshme një mujore në vend.
Tërmeti në vitin 2010 në Haiti
Më 12 janar të vitit 2010, Haiti u godit me një nga tërmetet më vdekjeprurëse në shekullin e fundit.
Sipas shifrave zyrtare, tërmeti 7 ballë që u regjistrua në jug të vendit shkaktoi 316 mijë të vdekur dhe rreth 300 mijë të lënduar.
Në tërmetin që shkaktoi shkatërrime të mëdha 1.3 milionë njerëz mbetën pa shtëpi.
