Diplomati amerikan për Evropën dhe Euroazinë, i dërguari për Ballkanin Perëndimor, Gabriel Escobar, gjatë vizitës në Podgoricë dha mesazhin e mbështetjes për Malin e Zi si shtet sovran dhe gjithë përfshirës.
Ai takoi kryeministrin, Zdravko Krivokapiq dhe kryeparlamentarin Aleksa Beçiq. Escobar, gjatë bisedës me kryeministrin malazez i kërkoi atij të mbajë fokusin në reformat e nevojshme për të përshpejtuar anëtarësimin e Malit të Zi në Bashkimin Evropian.
Escobar tha me këtë rastse Shtetet e Bashkuara janë përkrah gjithë atyre që mbështesin një Mal të Zi sovran, gjithëpërfshirës dhe qytetar. Kryeministri malazez ndërkaq në një konferencë për media tha se Qeveria “ka treguar rezultate të dukshme” dhe se nga zyrtari amerikan ka marrë “mbështetje të parezervë për vazhdimin e rrugës së saj”.
