Turqia dhe Arabia Saudite do të fillojnë një “epokë të re” për të avancuar marrëdhëniet dypalëshe, tha presidenti turk Recep Tayyip Erdoğan, raporton Anadolu Agency (AA).
“Vizita ime (në Arabinë Saudite) është manifestimi i vullnetit tonë të përbashkët për të filluar një epokë të re bashkëpunimi si dy vende vëllazërore”, u tha Erdoğan gazetarëve në aeroportin Ataturk të Stambollit përpara nisjes së tij për një vizitë dyditore në Xhedah.
Presidenca e Turqisë njoftoi vizitën e Erdoğan-it të mërkurën, duke thënë se ajo vjen me ftesë të mbretit Salman bin Abdulaziz Al Saud të Arabisë Saudite.
Marrëdhëniet midis Ankarasë dhe Riadit “do të rishikohen në të gjitha aspektet dhe do të diskutohen mundësitë e zhvillimit të bashkëpunimit”, tha presidenca.
“Gjatë takimeve do të shkëmbehen mendime për çështjet rajonale dhe ndërkombëtare si dhe marrëdhëniet dypalëshe”, thuhet në deklaratë.
Muajin e kaluar, ministri i Jashtëm turk Mevlüt Çavuşoğlu tha se hapat e mëdhenj po vazhdojnë për të normalizuar marrëdhëniet me Arabinë Saudite.
“Ne nuk kishim qëndrim negativ ndaj Arabisë Saudite për sa i përket normalizimit të marrëdhënieve, qoftë komercialisht, ekonomikisht apo politikisht”, i tha Çavuşoğlu transmetuesit turk të lajmeve A Haber në një intervistë televizive.
Turqia dhe Arabia Saudite kishin përkeqësim të lidhjeve në vitet e fundit lidhur me politikën e jashtme. Tensionet u rritën pas vrasjes së gazetarit Jamal Khashoggi në vitin 2018 në Konsullatën e Arabisë Saudite në Stamboll. /aa
