Me lëshimin e satelitit kombëtar të vëzhgimit IMECE në janarin e ardhshëm dhe Turksat 6A në mesin e vitit 2023, numri i satelitëve turq në hapësirë do të arrijë në dhjetë, tha të martën presidenti turk Rexhep Tajip Erdogan.
“Ne do të lëshojmë IMECE, satelitin tonë vendas kombëtar të vëzhgimit, të zhvilluar nga inxhinierë turq, në janar 2023 dhe Turksat 6A në mesin e 2023,” tha ai në një fjalim në ceremoninë e nisjes së Turksat 5B në Ankara.
Me këtë rast, Erdogan prezantoi informacionet më të fundit për aktivitetet hapësinore të vendit.
“Sateliti Turksat 5B do ta bëjë të pandërprerë kapacitetin tonë televiziv dhe satelitor me brez të gjerë nga Afrika në Lindjen e Mesme dhe Azi,” tha Erdogan.
Ai vuri në dukje se ky satelit do të ofrojë mbështetje për agjencitë dhe shërbimet për fatkeqësitë dhe emergjencat me synim ruajtjen e komunikimit në zonat rurale dhe malore.
Erdogan tha se deri më tani ka pasur disa vështirësi teknike në aksesin në programet e arsimit në distancë për shkak të infrastrukturës së pamjaftueshme të internetit.
“Kjo është e vërtetë. Sateliti Turksat 5B do të na shërbejë për 30 vjet”, tha presidenti turk.
Ai përkujtoi se autoritetet turke janë duke zhvilluar aktivitete të shumta në fushën e kërkimeve hapësinore.
“Ne po ndërmarrim hapa që do ta sjellin vendin tonë në nivelin që meriton në çdo fushë,” tha Erdogan, duke shtuar se teknologjitë satelitore janë një nga ato fusha.
Turqia lëshoi në hapësirë satelitin Turksat 3A në vitin 2008, pastaj Turksat 4A në 2014 dhe Turksat 4B në 2015.
Turqia nisi Turksat 5A në hapësirë vitin e kaluar./tesheshi/
