Presidenti i Turqisë, Recep Tayyip Erdoğan, ka realizuar një sërë bisedash telefonike lidhur me zhvillimet e fundit në krizën mes Katarit dhe disa vendeve arabe.
Sipas të dhënave nga burimet presidenciale, Erdoğan ka zhvilluar biseda telefonike me emirin e Katarit Shejh Tamim bin Hamad Al Thani, presidentin e Rusisë Vladimir Putin, emirin e Kuvajtit Shejh Sabah Al Ahmed Al Sabah dhe mbretin e Arabisë Saudite Selman bin Abdulaziz Al Saud, raporton AA.
Siç njoftohet, gjatë bisedave telefonike është theksuar rëndësia e paqes dhe stabilitetit në rajon dhe e uljes së tensioneve aktuale përmes rrugës së dialogut dhe diplomacisë.
Mësohet se Erdoğan do t’i vazhdojë kontaktet e tij lidhur me këtë çështje.
