ANKARA (AA) – Shefi ekzekutiv i kompanisë hapësinore amerikane Space X, Elon Musk, arriti në Turqi të mërkurën për të diskutuar lançimin e dy satelitëve të rinj turq, raporton Anadolu Agency (AA).
“Elon Musk erdhi në Turqi për të diskutuar për lançimin e satelitëve Turksat 5A dhe 5B”, tha për AA zëdhënësi i Presidencës së Turqisë, Ibrahim Kalın.
Ai u prit nga presidenti Recep Tayyip Erdoğan në kompleksin presidencial në kryeqytetin turk Anakara.
Në takimin me dyer të mbyllura gjithashtu morën pjesë edhe Ministri turk i Teknologjisë, Faruk Özlü, dhe Ministri i Transportit, Ahmet Arslan.
Të enjten priten të zhvillohen diskutime për një marrëveshje me kompaninë për prodhimin e satelitëve të zgjedhur nga Turqia, Airbus Defence and Space, për të cilën Space-X është nën-furnizues, shtoi Kalın.
Turqia shpreson të lançojë Turksat 5A në hapësirë deri në vitin 2020 dhe Turksat 5B deri në vitin 2021.
Një tjetër satelit, Turksat 6A, gjithashtu do të fillojë operacionet në vitet e ardhshme, duke rritur numrin e satelitëve aktivë të komunikimit të Turqisë në gjashtë, tha ai.
Kalın shtoi se projekti i shumëpritur për veturën e parë të prodhuar në Turqi, i shpalosur nga presidenti Erdoğan javën e kaluar, po ashtu është diskutuar me Musk, i cili gjithashtu është drejtues i autoprodhuesit amerikan Tesla.
“Kompania e Elon Musk është në fakt një kompani e energjisë së qëndrueshme. Pra, ne biseduam për tema si bateritë e gjeneratës së re, energjia diellore dhe energjia e erës”, tha ai.
“Ne gjithashtu diskutuam çështje si mënyra për të kapërcyer problemet e trafikut në zonat metropolitane, gërmimi i tuneleve dhe trafiku nëntokësor”, tha Kalın.
