Mesazhet e forta nga toka saudite mbi paudhësitë në tokën e Perëndimit
Organizata e Bashkëpunimit Islamik (OIC) bëri thirrje të dielën për veprime kolektive kundër ripërdhosjes së Kur’anit dhe fyerjeve ndaj Profetit Muhamed.
Me ftesë të Arabisë Saudite, në Jeddah po mbahet një seancë e jashtëzakonshme e Komitetit Ekzekutiv të OIC-së, ku diskutohet djegia e fundit e një kopjeje të Kur’anit para një xhamie në kryeqytetin suedez Stokholm.
Sekretari i përgjithshëm i OIC-së, Hissein Brahim Taha para fillimit të seancës tha se bëhet fjalë për provokime të përsëritura të papranueshme, transmeton Anadolia.
“Mos respektimi dhe fyerja e Kur’anit dhe e Profetit Muhamed nuk janë incidente të zakonshme islamofobike. Ne theksojmë nevojën për të zbatuar ligjin ndërkombëtar për të ndaluar urrejtjen fetare”, tha ai në një deklaratë dhe bëri thirrje për “masa kolektive” kundër incidenteve të tilla.
Provokim me prezencën e policisë
Taha u bëri thirrje vendeve anëtare të OIC që të jenë të bashkuar për të kundërshtuar mosrespektimin dhe fyerjet ndaj Kur’anit dhe Profetit Muhamed.
Më 28 qershor, shtetasi irakian Salwan Momika dogji një kopje të Kur’anit përpara një xhamie në Stokholm.
Provokimi ka ndodhur në prani të policisë, në ditën e parë të Kurban Bajramit.
Ministri i Jashtëm turk Hakan Fidan dënoi djegien e Kur’anit në Suedi.
“Unë dënoj aktin në Suedi kundër librit tonë të shenjtë në ditën e parë të Bajramit,” shkroi ai në Twitter të mërkurën, duke shtuar se ishte e papranueshme të lejoheshin protesta anti-islame në emër të lirisë së shprehjes.
Departamenti Amerikan i Shtetit e përshkroi djegien e një kopje të Kur’anit në Stokholm si “mosrespektim dhe të dhimbshëm”.
I pyetur për incidentin, Vedant Patel, zëvendës zëdhënës i Departamentit të Shtetit të SHBA-së, u përgjigj: “Ne kemi thënë vazhdimisht se djegia e teksteve fetare është mungesë respekti dhe e dhimbshme, dhe ajo që mund të jetë e ligjshme nuk është domosdoshmërisht e përshtatshme.”
Erdogan: Kjo nuk është liri e mendimit
Ai shtoi se më shumë komente për këtë incident mund të bëhen nga qeveria suedeze dhe policia lokale.
Patel theksoi se ata vazhdojnë të inkurajojnë Hungarinë dhe Turqinë që të ratifikojnë pa vonesë protokollin e anëtarësimit për pranimin e Suedisë në NATO.
Djegia e një kopjeje të Kur’anit u dënua edhe nga presidenti turk Rexhep Tajip Erdogan, i cili tha se “ne do t’i mësojmë Perëndimit se fyerja e vendeve të shenjta të muslimanëve nuk është liri e mendimit”.
“Ata që e bëjnë këtë krim, që e lejojnë nën petkun e lirisë së mendimit, që mbyllin sytë para kësaj poshtërsie, nuk do t’i arrijnë qëllimet e tyre. Ne do të reagojmë më fuqishëm derisa të zhvillohet një luftë vendimtare kundër organizatave terroriste dhe armiqve të Islamit,” tha ai.
“Në fund, ne do t’u mësojmë monumenteve perëndimore të arrogancës se fyerja e vendeve të shenjta të muslimanëve nuk është liri e mendimit”, përfundoi Erdogan.
Gjykata Supreme e Irakut ka ndërmarrë hapa për të ekstraduar Momika-n për t’u përballur me gjyqin në Irak.
Ata inkurajojnë urrejtjen, përjashtimin dhe racizmin
Kryetari i Këshillit të Lartë Gjyqësor, Faik Zeydan, urdhëroi që të ndërmerren veprimet e nevojshme ligjore për të kthyer irakianin në vend dhe për t’u përballur me gjyqin.
Dhjetra protestues irakianë sulmuan oborrin e ambasadës suedeze në Bagdad të enjten për të shprehur zemërimin e tyre për djegien e një kopjeje të Kur’anit.
Demonstruesit arritën të thyejnë portën e ambasadës dhe të hyjnë në kompleks.
Kanali suedez i radios në gjuhën arabe raportoi se i gjithë stafi i ambasadës ishte i sigurt.
Disa vende arabe kanë dënuar gjithashtu djegien e Kuranit, duke thënë se ai nxit urrejtje.
“Këto akte të urrejtjes dhe të përsëritura nuk mund të pranohen me asnjë justifikim. Ata në mënyrë eksplicite nxisin urrejtje, përjashtim dhe racizëm”, tha Ministria e Punëve të Jashtme saudite.
Ministria e Punëve të Jashtme e Jordanisë tha se kishte thirrur ambasadorin suedez në Aman për të protestuar ndaj “lejimit të ekstremistëve” të qeverisë suedeze për të djegur një kopje të Kur’anit.
Ministria e dënoi atë si një akt “racizmi dhe urrejtjeje”.
Emiratet e Bashkuara Arabe thanë se thirrën ambasadoren suedeze në vendin e Gjirit dhe i dhanë asaj një notë proteste.
Përbuzja për fenë e tjetrit nuk është liri e shprehjes
Egjipti, një vend me shumicë muslimane, e quajti djegien e Kur’anit një “akt të turpshëm, i cili zgjon ndjenjat e muslimanëve në mbarë botën”.
Maroku tërhoqi ambasadorin e tij në Suedi për “konsultime të pacaktuara”.
Ministria e Punëve të Jashtme ftoi të ngarkuarin me punë të Suedisë në Rabat dhe e informoi atë për refuzimin maroken të “këtij akti të papranueshëm”.
Liga Arabe tha se kreu i saj, Ahmed Abul Gheit, dënoi lejen e autoriteteve suedeze për aktin.
“Përçmimi i fesë së dikujt tjetër nuk i përket aspak lirisë së shprehjes”, tha ai.
/tesheshi.com/
