Ministri i Jashtëm i Serbisë Ivica Dacic ka befasuar me deklaratën e tij, kur ka thënë se në vitin 2005 ndërkombëtarët i kanë propozuar Serbisë ndarjen e Kosovës.
Sipas “Klan Kosova”, kryediplomati serb për televizionin “BN” tha se demarkacioni i Kosovës nuk është një ide nga dje dhe se për të flitet prej kohësh.
Gjithsesi, Ivica Dacic nuk ka dhënë më shumë informacione se kush e ka dhënë këtë ide vite më parë dhe përse ajo nuk u bë realitet.
Duke folur për tensionet aktuale me Kosovën, Dacic është shprehur se Gjermania dhe Britania janë ato që e bindin kryeministrin Ramush Haradinaj të mos e heqë taksën ndaj Serbisë.
“Gjermania dhe Britania e bindin Haradinajn që të mos e heq taksën për mallrat nga Serbia. Dikush mendon se Haradinaj është i guximshëm por ata nuk bëjnë asgjë pa mbështetjen e jashtme. Amerika nuk do të lejojë Serbinë të jetë konstruktive dhe Kosova të jetë e keqe, se kjo e shkatërron konceptimin e tyre”, është shprehur Dacic.
