Raporti trishtues: Prindërimi, gjithnjë e më i huaj për të rinjtë
Normat e lindjeve kanë rënë ndjeshëm në disa nga vendet më të pasura të botës dhe ka të ngjarë të mbeten të ulëta pasi shqetësimet ekonomike i detyrojnë njerëzit të peshojnë kostot e lindjes së fëmijëve, sipas një raporti të Organizatës për Bashkëpunim Ekonomik dhe Zhvillim (OECD).
Shumë në vendet anëtare të OECD-së tani po zgjedhin nëse do të kenë fëmijë më vonë në jetë apo jo fare, thuhet në dokument.
“Si të rinjtë dhe të rejat po e gjejnë gjithnjë e më shumë kuptimin e jetës jashtë prindërimit,” thuhet në raport.
Rënia e normës totale të lindshmërisë
Shkalla e përgjithshme e lindshmërisë në vendet e OECD ra në një mesatare prej 1.5 fëmijë për grua në 2022 nga 3.3 në 1960, thuhet në raport, duke përdorur një njësi që mat numrin mesatar të fëmijëve të lindur për grua gjatë gjithë jetës.
“Megjithëse vendet po zbatojnë një sërë politikash për të mbështetur familjet, kostoja ekonomike dhe pasiguria financiare afatgjatë vazhdojnë të ndikojnë ndjeshëm në vendimin e njerëzve për t’u bërë prindër,” tha Stefano Scarpetta, drejtor i Departamentit të Punësimit, Punës dhe Çështjeve Sociale të OECD.
Normat më të ulëta të lindshmërisë janë matur në Kore, me 0.7 fëmijë për grua, e ndjekur nga Italia dhe Spanja, ku norma është 1.2. Normat më të larta janë matur në Izrael me 2.9 fëmijë për grua, e ndjekur nga Meksika dhe Franca me 1.8 secila.
Mosha mesatare e grave që lindnin u rrit nga 28.6 në 2000 në 30.9 në 2022 në ekonomitë kryesore të industrializuara.
Presioni për të qenë prindi ideal
Duke krahasuar gratë e lindura në 1935 dhe 1975, në Estoni, Itali, Japoni, Lituani, Poloni, Portugali dhe Spanjë, përqindja e atyre pa fëmijë është dyfishuar, tregojnë të dhënat e OECD.
“Numri i njerëzve pa fëmijë po rritet pothuajse kudo,” tha Tomas Sobotka, një studiues në Institutin e Vjenës për Demografinë.
Presioni për të qenë prindër të mirë, që përfshin kushtimin e kohës për rritjen e fëmijëve, ka bërë që të rinjtë të vonojnë ose shmangin krijimin e një familjeje, sipas organizatës me bazë në Paris.
“Dëshmitë cilësore nga Evropa zbulojnë se një nga arsyet pse disa gra në të tridhjetat e hershme zgjedhin të vonojnë lindjen e fëmijëve është se ato nuk besojnë se mund të jenë nëna ideale”, shtoi ai. /tesheshi.com/
