Bosnja u tregon njerëzve qindra xhami, objekte fetare të shkatërruara nga forcat serbe dhe kroate gjatë luftrave të viteve 1990
Bosnja dhe Hercegovina ka shënuar të hënën Ditën e Xhamive me ngjarje informative në të gjithë vendin.
Vendi i vogël ballkanik, i cili mbijetoi granatimet masive gjatë viteve 1990, si dhe masakrat dhe gjenocidin e Srebrenicës më 1995, shënon 7 Majin si Ditën e Xhamive.
Gjatë ditës, publiku është informuar për qindra xhami dhe ndërtesa të ndryshme fetare të shkatërruara nga forcat serbe dhe kroate gjatë luftës së Bosnjës 1992-1995.
Data shënon Ditën kur Xhamia historike Ferhadija në qytetin e Banja Llukës u shkatërrua nga forcat serbe.
Xhamia konsiderohet simbol kulturor i vendit, por ka pësuar dëme të mëdha nga dinamiti në maj të vitit 1993.
Megjithatë, nuk ishte xhamia e vetme e shkatërruar gjatë luftës.
Sipas Bashkësisë Islame të Bosnjes, u shkatërruan 614 xhami, 218 mejtepe, mesxhide, 69 klasë të kurseve Kur’anore, katër teqe, 37 varreza dhe 405 objekte të trashëgimisë historike muslimane.
Rreth 534 xhami në territoret e kontrolluara nga forcat serbe u shkatërruan, ndërsa 80 xhami u shkatërruan në territore nën forcat kroate.
Sipas Bashkësisë Islame të Bosnjes 80 për qind e 1,144 xhamive në Bosnje u shkatërruan ose u dëmtuan. Përveç xhamive të shkatërruara dhe ndërtesave të tjera fetare, mbi 100 imamë u vranë nga forcat serbe dhe kroate.
Sipas statistikave, sot Bosnja ka 1,912 xhami. Gjithsej 789 nga xhamitë dhe mejtepet që u shkatërruan u rihapën për shërbim, ndërsa 89 janë duke pritur që të rindërtohen.
Pas 15 vjetësh restaurimi, Xhamia Ferhadija u rihap në 7 maj 2016 në përvjetorin e shkatërrimit të saj falë punës së gjerë restauruese të Agjencisë Shtetërore të Ndihmës Turke, Agjencisë Turke për Bashkëpunim dhe Koordinim (TIKA).
Xhamia është ndërtuar në vitin 1579 nga Sanxhak Bej dhe Ferhat Pasha dhe konsiderohet si një nga arritjet më të mëdha të arkitekturës islamike të inspiruar nga osmanët në Evropë.
Por gjatë Luftës së Bosnjës të viteve 1990, xhamia u shkatërrua nga Ushtria e Republikës Srpska.
Projekti i parë i restaurimit u nis në vitin 2001 nga Bashkimi Islamik Boshnjak, por u zhvillua me vështirësi për shkak të mungesës së mjeteve.
TIKA mori përsipër projektin e restaurimit në vitin 2014.
Burimi : World Bulletin/ ML
