Qytetari, Nexhat Krasniqi i cili është i ndaluar në këtë pikëkalim kufitar bashkë me shumë të tjerë nga Kosova tregoi se policia kufitare është duke i marr në pyetje (nga koha kur po raportohet 10:17).

“Isha në kabinat e Policisë, na morën në pyetje. Na i morën emrin, mbiemrin, adresën ku banojmë dhe jetojmë, çka punojmë, etj. më shumë maltretim e hakmarrje qysh jam duke e vërejt, nuk e di. Po garant për shkak të Këshillit të Evropës dhe për shkak të një serbi që e kanë ndal e burgos atje në kufirin tonë, e për qata po më duket që ata po hakmerren më së shumti”, tha Krasniqi.

Ai tregoi po ashtu se brenda në kabinat e policisë janë diku rreth 17 qytetarë të Kosovës që mbi një orë janë duke u marr në pyetje e siç tha ai nuk po i lejojnë që të dalin.

“E pyeta një serb këtu e më tha që kanë urdhër prej s’nalti duhet me ju marr në pyetje. Këta po dyshojnë në do emra si p.sh Jashari, Morina do mbiemra që janë të ndjeshëm në Kosovë ata po i marrin dhe po i mbajnë në kabina e nuk po i lëshojnë me dalë…”, tha Krasniqi.

Ai tha se atë e kanë mbajtur mbi 7 minuta në kabinë duke e intervistuar.

“Më pyetën ku je kon, ku po shkon. Unë ju tregova që punoj nëpër Serbi, punojna…ua përmenda do qytete të Serbisë ku punojë, do mbiemra të serbëve që punojë te ta…punë e kam. Ma morën emrin, mbiemrin, adresën, shpinë ku banoj, ku jetoj qisi sene. E, më thanë je i lirë. I pyeta a mund ta di se çfarë po ndodh, më thanë që nuk varet prej neve kjo punë, e tjerët janë krejt mrena. Minimum që një orë e gjysmë janë brenda duke i marr në pyetje, afër 16 ose 17 qytetarë duke i marr në pyetje”, ka thënë Krasniqi.

Ndërkaq, edhe Valdet Hoxha, i cili është pronar i Kompanisë “Teuta Tours”, i cili është nisur nga Kosova për në Slloveni tregoi për Telegrafin se janë të bllokuar që disa orë.

Ai në një deklaratë për Telegrafin ka treguar se që nga ora 23:00 e mbrëmjes së kaluar janë duke pritur në këtë pikëkalim kufitar pa asnjë arsye të dhënë nga autoritetet serbe.

“Po presim në pikëkalimin kufitar Batrovc, na i kanë marr dokumentet e tash po presim. Prej orës 22:30 mbrëmë natën jemi duke prit këtu. Shkojmë pyesim, por nuk na japin shpjegim. Na thonë që ju ka ardh urdhër prej naltit, duhet me prit çka po thonë. Jemi 30 pasagjerë në autobusë tonin.

Ndërkaq, edhe sekretari i Zyrës ndërlidhëse të Kosovës në Serbi, Fatmir Haxholli ka bërë të ditur se në hakmarrje dhe nervozizëm absurd ndaj votimit të Asamblesë Parlamentare të Këshillit të Evropës, për anëtarësimin e Republikës së Kosovës në këtë institucion ndërkombëtar, autoritetet kufitare të Serbisë, në pikëkalimin ‘Batrovc’, Serbi – Kroaci, nga mesnata po i mbajnë të bllokuar së paku katër autobusë me targa dhe udhëtarë, qytetarë të Republikës së Kosovës. /Telegrafi/