Hiqet ndalimi për armët amerikane në Ukrainë për sulm brenda Rusisë, Zelensky: Raketat do të flasin vetë!
Administrata e presidentit Biden ka hequr kufizimet që bllokuan Ukrainën nga përdorimi i armëve të ofruara nga Shtetet e Bashkuara për sulme thellë në territorin rus, raporton Reuters, duke cituar tre burime të njohura me këtë çështje.
Agjencia britanike thekson se ky është një ndryshim i rëndësishëm në politikën amerikane në konfliktin ruso-ukrainas.
Ukraina planifikon të nisë sulmet e para me rreze të gjatë në ditët në vijim, thanë burimet, pa dhënë detaje për shkak të shqetësimeve të sigurisë operacionale.
Lëvizja e SHBA-së, e cila vjen pak më shumë se dy muaj përpara se presidenti i sapozgjedhur Donald Trump të marrë detyrën më 20 janar, vjen pas disa muajsh kërkesash nga presidenti ukrainas Volodymyr Zelensky për të lejuar Kievin të përdorë armët amerikane për sulme me rreze të gjatë kundër objektivave ushtarake ruse.
Ndryshimi erdhi pasi Rusia dërgoi trupa tokësore të Koresë së Veriut për të plotësuar forcat e veta, një zhvillim që shkaktoi alarm në Uashington dhe Kiev, shkruan Reuters.
Sulmet e para të thella ka të ngjarë të kryhen duke përdorur raketa ATACMS që kanë një rreze veprimi deri në 306 kilometra, sipas burimeve.
Qëndrimi i Trump
Megjithëse disa zyrtarë amerikanë kanë shprehur skepticizëm se lejimi i sulmit me rreze të gjatë do të ndryshojë rrjedhën e përgjithshme të luftës, vendimi mund të ndihmojë Ukrainën në një kohë kur forcat ruse po bëjnë përfitime dhe ndoshta ta vendosë Kievin në një pozicion më të mirë negociues.
Nuk është e qartë nëse Trump do të ndryshojë vendimin e Biden-it kur të marrë detyrën. Trump ka kritikuar prej kohësh shtrirjen e ndihmës financiare dhe ushtarake të SHBA-së për Ukrainën dhe ka premtuar një fund të shpejtë të luftës, pa shpjeguar se si.
Megjithatë, disa republikanë në Kongres i kanë bërë thirrje Biden-it që të lirojë rregullat se si Ukraina mund të përdorë armët që i janë dhënë nga SHBA. Rusia ka paralajmëruar se do të shohë një lëvizje për të lehtësuar kufizimet në përdorimin e armëve amerikane nga Ukraina si një përshkallëzim të madh.
Presidenti Volodymyr Zelensky ka pranuar raportimet e mediave për përdorimin e ATACMS kundër Rusisë, por ai nuk konfirmoi ose mohoi nëse ishte dhënë leja për t’i përdorur ato nga SHBA.
Reagimi nga Zelensky
Përmes një video-deklarate në Telegram, Zelensky tha se ai kishte paraqitur një “plan fitoreje” për aleatët, i cili përfshinte përforcimin e ushtrisë me armë”me rreze të gjatë veprimi.
“Në media thonë se kemi marrë leje për të ndërmarrë veprimet e duhura, por sulmet nuk realizohen me fjalë. Gjëra të tilla nuk njoftohen. Raketat do të flasin vetë”, shkroi ai. /tesheshi.com/
