Shkup/Prishtinë/Tiranë
Në xhamitë në rajonin e Ballkanit, besimtarët muslimanë kanë falur namazin e parë të teravisë duke mbushur xhamitë, raporton Anadolu Agency (AA).
– Në Shkup besimtarë të shumtë falen jashtë xhamisë së stërmbushur
Në Maqedoninë e Veriut është falur namazi i parë i taravisë për këtë Muaj të Ramazanit. Muslimanët mbushën xhamitë për taravinë e parë anembanë vendit.
Xhamia historike e Mustafa Pashës në kryeqytetin Shkup ishte gjithashtu e mbushur me muslimanë që erdhën për të falur namazin e parë të teravisë së këtij viti. Shkaku i numrit të madh të besimtarëve, disa prej tyre u falën edhe jashtë xhamisë.
“Sulltan Mehmet Fatih” pret qindra besimtarë në teravinë e parë
Në të gjitha xhamitë në territorin e Kosovës, besimtarët muslimanë kanë falur namazin e teravisë së parë të Muajit të Ramazanit.
Besimtarë të shumtë këtë mbrëmje e mbushën me praninë e tyre edhe Xhaminë e Madhe të Prishtinës “Sulltan Mehmet Fatih”
Kreu i Bashkësisë Islame i Kosovës (BIK), Naim Tërnava, uroi sot besimtarët muslimanë për ardhjen e Muajit të Ramazanit duke thënë se agjërimi është ibadet i veçantë, që realizohet në muajin e caktuar, me vakte, mision dhe synim të caktuar.
Një ditë më herët myftiu Tërnava nëpërmjet një letre dërguar Këshilleve lokale të BIK-ut, ka tërhequr vërejtjen për disa rregulla që duhet të ndiqen nga xhamitë dhe imamët në Republikën e Kosovës, si: falja e namazit të teravive të bëhet me 20 rekate, të shkurtohet hutbeja e xhumasë gjatë Ramazanit, të mos hahet syfyr dhe iftar brenda xhamive, përpos hapësirës rreth xhamisë, oborri dhe objektet përcjellëse, ligjëruesit e huaj nëpër xhami duhet të ftohen vetëm me lejen paraprake të BIK-ut, e të tjera.
– Besimtarët muslimanë mbushin xhamitë edhe në Shqipëri
Besimtarët muslimanë në Shqipëri kanë falur namazin e teravisë së parë duke mbushur xhamitë e vendit.
Dhjetëra besimtarë janë mbledhur për namazin e teravisë së parë në Xhaminë Et’hem Beu në Tiranë, duke kryer ibadetet fetare, në prag të fillimit të muajit të Ramazanit.
Namazi i teravisë është falur edhe në xhamitë e tjera të kryeqytetit, por dhe qyteteve të tjera të Shqipërisë, ku janë mbledhur besimtarë të shumtë.
Besimtarët muslimanë më 23 mars fillojnë muajin e shenjtë të Ramazanit.
/aa/
