Numri i të vdekurve në Rripin e Gazës vazhdon të rritet dita ditës, ndërsa bota pret vendimin e Gjykatës Ndërkombëtare të Drejtësisë (GJND) në rastin e padisë së ngritur nga Republika e Afrikës së Jugut kundër Izraelit për gjenocid mbi enklavën e bllokuar palestineze, raporton Anadolu.
Më shumë se 24.600 palestinezë janë vrarë deri më tani në sulmet izraelite dhe më shumë se 61.800 të tjerë janë plagosur. Miliona njerëz të zhvendosur po jetojnë atë që ekspertët e Kombeve të Bashkuara (OKB) e quajtën përsëri një “gjenocid të vazhdueshëm”, duke paralajmëruar se banorët e Gazës tani përbëjnë 80 për qind të të gjithë njerëzve që përballen me urinë katastrofike në mbarë botën.
Republika e Afrikës së Jugut i ka kërkuar GJND-së të ndalojë vrasjet dhe shkatërrimet që Izraeli ka shkaktuar në Rripin e Gazës që nga 7 tetori, duke paraqitur një kërkesë të veçantë urgjente për masa të përkohshme për të ndaluar fushatën vdekjeprurëse të Izraelit.
Pas përfundimit të seancës dëgjimore më 12 janar, GJND-ja lëshoi një deklaratë ku thuhej se gjyqtarët e saj tani do të fillojnë diskutimet dhe se vendimi i tyre do të jepet në një seancë publike, data e së cilës do të shpallet në kohë reale.
Avokati italian, Tiersisto Mariniello, i cili ishte në Hagë në seancën dëgjimore, tha për Anadolu se vendimi për kërkesën e Afrikës së Jugut për masa të përkohshme do të vijë më shpejt, sepse këtë e dikton procedura.
“Po flasim për një procedurë urgjente. Masa e përkohshme do të thotë përparësi ndaj të gjitha rasteve të tjera që trajtohen nga GJND-ja”, tha Mariniello, i cili është gjithashtu pjesë e ekipit ligjor që përfaqëson viktimat e Gazës në Gjykatën Ndërkombëtare Penale (GJNP).
Ai rikujtoi se GJND-ja më parë kishte marrë vendime në çështjet e lidhura me masat e përkohshme vetëm brenda tetë ditëve.
“Pra, mendoj se një vendim në këtë rast mund të pritet në shkurt, nëse jo më shpejt”, tha Mariniello.
Një tjetër faktor, të cilin Mariniello vuri në dukje, është se disa nga gjyqtarët do të zëvendësohen në shkurt për shkak të përfundimit të rregullt të mandatit të tyre.
Aktualisht për çështjen janë 15 gjyqtarë nga Australia, Brazili, Kina, Franca, Gjermania, India, Xhamajka, Japonia, Libani, Maroku, Rusia, Sllovakia, Somalia, Uganda dhe SHBA-ja, së bashku me nga një gjyqtar ‘ad hoc’ nga Republika e Afrikës së Jugut dhe Izraeli.
Gjyqtarët nga Xhamajka, Maroku, Rusia dhe SHBA-ja do të largohen nga postet e tyre muajin e ardhshëm dhe do të zëvendësohen nga gjyqtarë nga Meksika, Rumania, Afrika e Jugut dhe SHBA.
“Unë personalisht, pa spekuluar shumë, besoj se vendimi do të merret para zëvendësimit të gjyqtarëve”, tha Mariniello.
Ai shtoi se nuk duhet të harrojmë ndërhyrjet e mundshme në këtë rast nga vendet e treta, siç ka paralajmëruar tashmë Gjermania.
“Lidhur me këtë lind pyetja se çfarë do të bëjë gjykata? A do t’i pranojë parashtrimet e tyre, duke i ftuar ata të paraqesin seancat e tyre dëgjimore? Do të shohim. Për këtë tani vendosin gjyqtarët”, tha avokati italian.
– Vlerësimi i argumenteve
Akuzat e ngritura nga Republika e Afrikës së Jugut kundër Izraelit në GJND u fokusuan në disa akte kryesore “të gjenocidit”, duke përfshirë vrasjen masive të palestinezëve, shkaktimin e lëndimeve të rënda mendore dhe fizike, zhvendosjen e detyruar dhe bllokimin e furnizimeve thelbësore, shkatërrimi i plotë i sistemit shëndetësor në Gaza dhe parandalimi i lindjeve në Gaza duke bllokuar trajtimin dhe ndihmën mjekësore.
Përgjigja e Izraelit u përqendrua në të drejtën e tij për vetëmbrojtje kundër Hamasit, duke mohuar se kishte “qëllim gjenocidal”, duke pretenduar se po përpiqej të “minimizonte” dëmin e civilëve dhe duke vënë në pikëpyetje vetë juridiksionin e GJND-së për të trajtuar çështjen.
“Parashtrimi dhe argumentet e Republikës së Afrikës së Jugut janë shumë, shumë bindëse. Parashtrimi është solid dhe ofron prova mjaft të forta në lidhje me të gjithë elementët e gjenocidit”, tha Mariniello.
Ai gjithashtu tha se mënyra në të cilën Republika e Afrikës së Jugut tregoi deklaratat e liderëve politikë dhe ushtarakë izraelitë ishte veçanërisht e rëndësishme dhe shtoi se të gjitha ato ishin “deklarata tipike gjenocidale”.
“Mbrojtja izraelite u përpoq të minimizonte deklaratat… ndërsa afrikano-jugorët treguan qartë se si ato deklarata morën zbatim konkret dhe efektiv në Gaza”, tha Mariniello.
– Standarde të dyfishta
Mariniello, i cili është i përfshirë në çështjet e paraqitura para GJNP-së në emër të viktimave të Gazës, është shumë kritik ndaj mungesës së angazhimit të Gjykatës Ndërkombëtare Penale kur bëhet fjalë për Palestinën.
“Unë nuk mendoj se dikush mund ta mohojë atë që ne mund ta quajmë standard të dyfishtë kur bëhet fjalë për mënyrën se si Palestina dhe viktima palestineze trajtohen nga komuniteti ndërkombëtar, krahasuar me situatat e tjera”, tha ai, duke përmendur si shembull urgjencën e treguar nga GJNP në lidhje me luftën në Ukrainë.
“Kurrë nuk ka pasur ndonjë deklaratë, as ndonjë hetues i GJNP-së nuk e ka vizituar ndonjëherë Izraelin apo Palestinën përpara dhjetorit 2023. Hetimi palestinez mori buxhetin më të vogël të çdo hetimi aktiv përpara GJNP-së, një të katërtën e buxhetit të Ukrainës, që na jep një pamje se cili është prioriteti për gjykatën”, tha Mariniello.
Duke deklaruar se GJPN-ja duket se ka ndryshuar paksa qasjen e saj gjatë konfliktit aktual me prokurorin aktual Karim Khan që vizitoi qytetin Rafah dhe shfaqi interes për këtë hetim, Mariniello beson se ka ende shumë probleme të qarta me qëndrimin e tij.
“Bile edhe kur Khan foli për këtë çështje, ai kurrë nuk përmendi kontekstin në të cilin po zhvillohet lufta në Gaza dhe nuk arriti të lidhë dhunën e kolonëve me politikën e shtetit izraelit”, tha Mariniello.
Avokati italian Mariniello në fund tha se është i shqetësuar se këto standarde të dyfishta do të vazhdojnë të karakterizojnë edhe hetimet e ardhshme.
