Kryetari i Vetëvendosjes, Albin Kurti, ka thënë se në negociatat për bashkëqeverisje me LDK-në, pret për të parë se cilat pozita do t’i kërkojë LDK-ja, atë të ministrisë së Jashtme apo të kryeparlamentarit.
Se a do t’ia ofrojë të dyja pozitat LDK-së, Kurti ka thënë se “është në rend i gjërave sepse tashmë ka një rezultat të zgjedhjeve”.
“I takon negociatave. Ka një pozitë që në praktikën e deritashme ishte më e rëndësishme, ajo e kryeparlamentarit. Duhet të shohim për çka janë më shumë, a për kryeparlamentarin apo të MPJ-së, është një rend i gjërave sepse ka një rezultat të zgjedhjeve”, ka thënë ai.
Megjithatë, sipas Kurtit, harmonizimi i programit është më i rëndësishëm se ndarja e posteve. Ai ka thënë se asnjëherë më parë, qytetarët nuk kanë votuar kaq shumë për ndryshim.
Për mundësinë e përfshirjes së AAK-së në një qeveri potenciale të VV-së me LDK-në, Kurti ka thënë se “AAK-ja më mirë është në opozitë”.
“AAK-në s’e barazoj me PDK-në, sepse s’ke si, por me qeverisjen e fundit, fort iu ka afruar. S’i kam barazuar asnjëherë me PDK-në. PDK rri në pushtet tjerët i merr me qira. Ta kontrollon shtetin, gjyqësinë, policinë, ATK-në etj. PAN-i është PAN, mirë që të shkojë në opozitë”, ka thënë ai duke përjashtuar edhe mundësinë e bashkëpunimit me Listën Serbe.
Ka thënë se do të bashkëpunojë me serbët që e njohin Kosovën si shtet dhe që e respektojnë atë./Koha.net
