Në një intervistë për median kroate, kryeministri Albin Kurti iu përgjigj fillimisht pyetjes nëse targat kishin çuar në situatën e fundit të acarimit me Serbinë apo nëse situata ishte më e ndërlikuar, të cilës ai iu përgjigj me vendosmëri:
“Ne ende kemi probleme me Serbinë, Kosova nuk është problem. Problemi është Serbia, veçanërisht presidenti i atij vendi që mendon dhe flet si në vitet ‘90 të shekullit të kaluar. Pikat kufitare të Jarinjes dhe Bërnjakut janë sot në krizë, jo për shkak të serbëve por për shkak të Presidentit të Serbisë”, tha Kurti.
Njerëzit në barrikada paguhen nga Serbia
Ai shpjegoi se më shumë se 11 mijë automjete të ardhura nga Serbia morën targat e përkohshme të Republikës së Kosovës pa asnjë problem.
“Kështu ata bashkëpunuan me policinë tonë dhe institucionet tona,” thotë Kurti.
Kryeministri i Kosovës thotë se ata që janë në barrikada janë njerëz të paguar nga Serbia.
“Disa prej tyre kanë një dosje të aktiviteteve kriminale në të kaluarën, ata kanë pikëpamje ekstreme për politikën dhe botën. Disa prej tyre gjithashtu morën pjesë në përpjekjen për grusht shteti në Malin e Zi pesë vjet më parë,” tha ai.
I pyetur nëse mendon se Aleksandar Vuçiç dëshiron të provokojë një konflikt ndërkombëtar, Kurti u përgjigj se nuk mund të mendojë ndryshe.
“Ju e sillni ministrin e Mbrojtjes në kufi me Kosovën, së bashku me ambasadorin rus në Serbi dhe atasheun e Mbrojtjes të Federatës Ruse në Beograd. Në të njëjtën ditë ata i vunë zjarrin një ndërtese në Zubin Potok. Gjithashtu, MiG-29 po rrethon Kosovën, helikopterë të prodhuar nga Rusia dhe automjete të blinduara … Kështu ata erdhën me një arsenal ushtarak në kufijtë e vendit tonë. Forcat tona speciale janë atje, si në Bërnjak ashtu edhe në Jarinje. Të mos harrojmë, një ditë pas shpalljes së pavarësisë së Kosovës më 18 shkurt 2008, ata dogjën pikat kufitare Jarinje dhe Bërnjak”, shton Kurti.
Gjithsesi, Kurti shprehu gatishmërinë për bisedime dhe negociata.
“Unë jam duke pritur që Presidentja e Komisionit Evropian, Ursula von der Leyen, t’i dërgojë mesazhe të qarta Serbisë, pasi nga Kosova ajo shkoi në Beograd, për të vazhduar vizitën e saj në rajonin tonë,” tha ai.
Kurti më parë deklaroi se, nëse një referendum do të mbahej në Kosovë, dhe sipas Kushtetutës ai nuk mund të mbahet, ai do të votonte për bashkimin, domethënë bashkimin e Kosovës dhe Shqipërisë.
“Ne jemi dy shtete, Kosova dhe Shqipëria, por nuk jemi dy kombe. Ne jemi një komb. Kufiri mes Kosovës dhe Shqipërisë, ne kurrë nuk mund të harrojmë se nuk është kufiri shqiptar apo kufiri i Kosovës. Ne duam që Prishtina dhe Tirana të punojnë së bashku sa më ngushtë, të integrohen dhe të ndihmojnë njëri -tjetrin,” tha ai.
Në fund, ai shtoi se nuk mendonte se ushtarët amerikanë do të tërhiqeshin.
“Unë nuk mendoj se ata do të tërhiqen. Kosova duhet të përfshihet në Partneritetin për Paqe. Imagjinoni, që nga viti 2006, ka qenë Serbia që merr armë nga Rusia, Bjellorusia dhe Kina, dhe jo Kosova”, tha Albin Kurti. /tesheshi.com/
