Afganistani i ka kërkuar Shteteve të Bashkuara të sqarojnë deklaratat e bëra nga presidenti Donald Trump, i cili tha se vendi “do të fshihej nga faqja e dheut” nëse ai do të donte të fitonte luftën në Afganistan, raporton CNN.
“Kombi afgan nuk ka dhe nuk do të lejojë asnjë fuqi të huaj për të përcaktuar fatin e tij “, tha në një deklaratë Sediq Sediqqi, zëdhënësi i presidentit të Afganistanit. “Duke pasur parasysh marrëdhënien e shumëfishtë midis Afganistanit dhe Shteteve të Bashkuara, qeveria e Republikës Islamike të Afganistanit bën thirrje për sqarime në lidhje me deklaratat e presidentit amerikan.”
Trump të hënën kishte thënë që ai mund t’i jepte fund luftës në Afganistan në një javë, por se do të kushtonte miliona jetë dhe do ta fshinte vendin “nga faqja e dheut”.
“Nëse duam të luftojmë një luftë në Afganistan dhe ta fitojmë atë, unë mund ta fitoj atë luftë brenda një jave. Unë thjesht nuk dua të vras 10 milionë njerëz”, tha Trump, duke qenë i ulur pranë kryeministrit pakistanez Imran Khan në Shtëpinë e Bardhë të hënën. “Unë kam plane për Afganistanin, sepse nëse do të doja ta fitoj atë luftë, Afganistani do të fshihej nga faqja e dheut. Ai do të zhdukej. Do ta bëja për gati 10 ditë por nuk do dua ta bëj – nuk dua të shkoj në këtë rrugë.”
SHBA ka ndjekur një strategji diplomatike për t’i dhënë fund luftës 18-vjeçare në Afganistan, duke mbajtur bisedime të vazhdueshme me talebanët në Katar për të arritur një marrëveshje paqeje. Më parë këtë muaj, një grup afganësh të shquar – duke përfshirë disa zyrtarë të qeverisë afgane – mbajtën dy ditë bisedime të përbashkëta me talebanët, duke rënë dakord jo zyrtarisht për një udhërrëfyes se si ata mund të arrijnë një marrëveshje paqeje.
Pavarësisht përparimit, sulmet kanë vazhduar që nga ajo kohë, duke përfshirë një bombardim vetëvrasës në një dasmë, një bombardim makinash jashtë selisë së Policisë së Kandaharit të Afganistanit dhe një shpërthim vdekjeprurës jashtë portës së Universitetit të Kabulit.
SHBA po shpreson se Pakistani mund të ndihmojë shtytjen e talebanëve për t’u takuar direkt me qeverinë afgane.
