Pyetja:
A lejohet zgjatimi i flokëve (i njohur si extension) që bëhet me flokë origjinal të njeriut?
***
Përgjigjja:
Falënderimi absolut i takon Allahut! Mëshira, lavdërimi edhe paqja qofshin mbi të Dërguarin e Allahut, Muhamedin ﷺ!
Së pari: Transmetimet profetike bazë mbi extension-in (zgjatimin) e flokëve
Transmetimi i parë: “Allahu e ka mallkuar [përzënë nga mëshira dhe mirësia e Tij] kë lidh flokët [i bën extension apo zgjatje të flokut me flok dikujt tjetër] dhe kë urdhëron t’i lidhen (zgjaten) flokët; si dhe kë bën tatuazh [i bën tatuazh dikujt tjetër] dhe kë urdhëron t’i bëhet tatuazh.”
Transmetimi i dytë: “Profeti ﷺ e ka quajtur mashtrim atë, pra lidhjen e flokut (zgjatjen) me flok tjetër.”
Në transmetimet profetike të këtij kapitulli, bëhet fjalë kryesisht për ndalimin e lidhjes (zgjatimit / shtimit / ngjitjes) së flokëve të gruas me flokë të tjerë (gjë që vlen për më tepër edhe për burrat).
Së dyti: Zgjatimi (extensioni) me flokë njerëzorë5:
a. Dispozita e zgjatimit (extension-it) me flokë njerëzorë
Thuajse të gjithë juristët muslimanë (përfshirë mendimet korrekte të katër medh’hebeve) e konsiderojnë haram6 (mëkat të madh të ndëshkueshëm) lidhjen (zgjatimin) e flokut të gruas me flokë njerëzorë (sidoqoftë: flokë gruaje, burri, mahremi me të cilin ndalohet përjetësisht martesa, të bashkëshortit etj.), qoftë gruaja e martuar ose jo, me ose pa lejen e bashkëshortit. Lexoni më tepër
b. Arsyeja e ndalimit të zgjatimit (extension-it) me flokë njerëzorë
Dy arsyet kryesore të ndalimit të zgjatimit (extension-it) me flokë njerëzorë janë:
Arsyeja e parë: Manipulohet dhe pështjellohet krijimi natyral që ka bërë Allahu;
Arsyeja e dytë: Me këtë veprim bihet në ndalesën e shfrytëzimit (përdorimit për përfitime të ndryshme) të elementëve të trupit njerëzor (ku përfshihet edhe floku i njerut), teksa urdhri hyjnor është që krijesa njerëzore të nderohet dhe mos cenohet (gjë që obligon ndalimin e shfrytëzimit apo përdorimit për përfitime të ndryshme të diç prej pjesëve të tij).
Së treti: Mbjellja dhe ngjitja e flokëve
a. Lejohet pa problem mbjellja e flokëve
Mbjellja e flokëve, në një formë të tillë që pas operimit floku të mbijë në skalp dhe të zgjatet vetë, lejohet pa problem, pasi hyn tek lëmi i largimit të së metës dhe kthimit të çështjes në trajtën natyrale në të cilën e krijoi Allahu i Madhëruar.
b. Ndalohet ngjitja e flokëve në skalp (lëkurën e kokës ku mbijnë flokët)
Ngjitja e flokëve në skalp është e ndaluar: (së pari) për shkak të konsiderimit të tyre në kontekstin e shtimit (extension-it) të flokëve njerëzorë (bazuar në mendimin e juristëve ndalues) dhe (së dyti) për faktin tjetër se vendosja e flokëve me ngjitje në skalp, pengon arritjen e ujit në skalp dhe siç dihet kjo gjë e bën guslin (larjen e madhe rituale) të pavlefshëm.
Allahu e di më mirë.
Alaudin Abazi
