Beteja delikate e Perëndimit më Moskën, ajo financiare
Për shkak të pushtimit rus të Ukrainës, BE, SHBA, Japonia dhe Kanadaja ndaluan transaksionet me Bankën Qendrore ruse dhe Ministrinë e Financave duke ngrirë rreth 300 miliardë dollarë asete ruse.
Rreth 200 miliardë dollarë janë bllokuar në llogaritë në Evropë, kryesisht në kleringun belg Euroclear.
Zyrtarët amerikanë dhe britanikë po propozojnë që asetet e ngrira të konfiskohen dhe të përdoren për të rindërtuar Ukrainën e shkatërruar nga lufta dhe shpresojnë që liderët e G7 do ta pranojnë propozimin në një takim në fund të shkurtit, mësoi Reuters në fund të dhjetorit në një bisedë me tre burime.
Por në një intervistë për Reuters, zyrtarët evropianë e hodhën poshtë këtë mundësi, duke shpjeguar se është shumë e rrezikshme ligjërisht.
“Pjesa më e madhe e aseteve ruse nuk do të konfiskohet. Anëtarët e BE nuk janë dakord për këtë çështje,” tha një zyrtar i lartë me njohuri mbi bisedimet, duke kërkuar anonimitetin. Në një intervistë me Reuters, Ministri i Jashtëm i Luksemburgut Xavier Bettel tha se ishte “shumë i kujdesshëm” në lidhje me konfiskimin.
Ndikimi në euro
“Imagjinoni nëse marrim një vendim politik që do t’i japim ato miliarda Ukrainës. Dhe në gjashtë muaj ne marrim një vendim gjykate që nuk mund t’ua japim atyre (ato para). Kush do t’i paguajë atëherë?”, shpjegon Bettel.
Krahas ligjshmërisë së një vendimi të tillë të paprecedentë, zyrtarët evropianë janë të shqetësuar edhe për pasojat e mundshme për euron. Investitorët mund të tërhiqen nga aktivet në euro nga frika se paratë e tyre një ditë mund të sekuestrohen.
Ministri belg i Financave Vincent van Peteghem, vendi i të cilit mban presidencën e BE-së deri në korrik, është shumë i rezervuar për mundësinë e konfiskimeve.
“Ne duhet të jemi shumë të kujdesshëm në lidhje me një propozim të tillë. Mendoj se është e rëndësishme që vetëm një propozim që është ligjërisht i sigurt të mund të diskutohet dhe se ne duhet të shmangim një ndikim të mundshëm në stabilitetin financiar,” u tha Van Peteghem gazetarëve të martën.
Rusia tashmë ka dërguar një paralajmërim
Zyrtarët thanë se Euroclear i Belgjikës ka asete “të rëndësishme” në Rusi. Moska mund ta kapte atë dhe kjo do të përbënte një rrezik për stabilitetin financiar të këtij kleringu me pasoja të mëdha.
Rusia tashmë ka paralajmëruar se mund të hakmerret duke sekuestruar pronat e vendeve evropiane, amerikane dhe të tjera që vendosin për një veprim të tillë. “BE-në nuk mund ta shpëtojë Euroclear,” tha një zyrtar tjetër i lartë. “Euroclear menaxhon triliona dhe falimentimi i tij do të tejkalonte shumë buxhetin e BE. Ne duhet të balancojmë rreziqet dhe fitimet,” shtoi ai.
Putin kërcënoi Evropën: “Nëse na konfiskoni pronën…”
Në vend të konfiskimit të aseteve ruse, qeveritë e BE-së ka të ngjarë të mbështesin propozimin e dhjetorit të Komisionit Evropian për të sekuestruar vetëm të ardhurat nga ato asete dhe për të lënë principalin të paprekur.
Kjo, siç vlerësohet, mund të gjenerojë 15 deri në 17 miliardë euro në katër vitet e ardhshme, të cilat mund të transferohen në Ukrainë, thanë zyrtarët. /tesheshi.com
