Ministri i Jashtëm i Turqisë, Mevlut Cavusoglu, ka komunikuar shqetësimet e Ankarasë lidhur me trajtimin e minoritetit mysliman ujgur, gjatë takimit që ka pasur në Pekin me homologun e tij kinez, Wang Yi. “Ne shprehëm pikëpamjet, pritshmëritë dhe ndjeshmërinë tonë në lidhje me çështjet e agjendës tonë, veçanërisht për turqit ujgurë”, tha Cavusoglu pas takimit të 12 janarit, ku tha se palët kanë biseduar edhe për bashkëpunimin ekonomik. Qeveria kineze është akuzuar se ka ngritur një rrjet të kampeve të ndalimit, ku po mban mbi një milion ujgurë dhe grupe të tjera etnike myslimane, në rajonin veriperëndimor Ksinjiang. Shtetet e Bashkuara dhe shumë grupe të të drejtave të njeriut kanë thënë se Pekini po kryen gjenocid ndaj ujgurëve. Kina mohon se kryen abuzime në Ksinjiang dhe thotë se po “riedukon” ujgurët me qëllim që të parandalojë islamin radikal dhe terrorizmin. Kjo çështje është e ndjeshme për Turqinë pasi ujgurët turq ndajnë lidhje etnike, fetare dhe gjuhësore. Çështja e ujgurëve është edhe një çështje e brendshme politike midis turqve nacionalistë dhe konservatorë. Por, presidenti turk, Recep Tayyip Erdogan është akuzuar se po qëndron i heshtur për situatën e vështirë në të cilën ndodhen ujgurët, për shkak të lidhjeve ekonomike dhe interesave të tjera që ka me Kinën, e cila është ekonomia e dytë më e madhe në botë. Në korrik, Erdogan gjatë një bisede me homologun e tij kinez, Xi Jingping tha se është e rëndësishme që ujgurët të jetojnë në paqe si “qytetarë të barabartë të Kinës”, por shtoi se Turqia respekton sovranitetin e Kinës. Në Turqi vlerësohet se jetojnë 50,000 ujgurë, që është diaspora më e madhe jashtë Azisë Qendrore.
/rel/
