Mirënjohja dhe empatia në vendin e punës janë thelbësore, pasi ato lidhen drejtpërdrejt me motivimin dhe arritjet e punonjësve – pra si mund të krijojmë një kulturë mirënjohjeje në mjedisin e punës?
Të gjithë e dimë se sa mirë ndihemi kur na falënderojnë, por mirënjohja është shumë më tepër se kaq. Në vendin e punës, një kulturë mirënjohjeje – d.m.th., duke treguar rregullisht dashamirësi dhe mirëkuptim – ka treguar se rrit hormonet pozitive në trupin tuaj duke përfshirë serotoninën, dopaminën dhe oksitocinën.
Mirënjohja dhe empatia në vendin e punës janë thelbësore, pasi lidhen drejtpërdrejt me motivimin dhe arritjet e punonjësve. Sipas një ankete të vitit 2013 nga Glassdoor u zbulua se më shumë se 80% e punonjësve janë të motivuar të punojnë më shumë kur vlerësohen për punën. Më e rëndësishmja, e njëjta anketë tregon që 53% e punonjësve do të kishin qëndruar në pozicionet e tyre për një kohë të gjatë, nëse do të ndiheshin më të vlerësuar. Pra, nëse motivimi i punonjësve është kaq i lidhur me një kulturë mirënjohjeje, ju me siguri po pyesni se si mund të krijoni një kulturë të tillë në vendin e punës?
Kultura e mirënjohjes në vendin e punës bazohet në ndërtimin e marrëdhënieve të forta, reciproke midis punëdhënësve dhe punonjësve. Ja se cilët janë disa hapa që të dyja palët mund të ndërmarrin për të pasur një kulturë të tillë në ambientin tuaj të punës:
Nga lart-poshtë:
Edhe pse punonjësit luajnë rol të rëndësishëm, mirënjohja realisht duhet të fillojë nga menaxherët dhe drejtuesit. Si drejtues, ju keni përgjegjësinë të veproni në mënyrë të tillë që më pas të merreni si shembull nga punonjësit dhe të krijoni një mjedis pozitiv në të cilin ata ndihen të vlerësuar dhe të sigurt në pozicionet e tyre. Pra, çfarë mund të bëni për të krijuar një mjedis të tillë pune?
-Gjëja e parë që drejtuesit mund të bëjnë është të festojnë jo vetëm për suksesin empirik. Është e thjeshtë të festosh kur një ekip ka rritur shitjet e tremujorit të fundit ose ka tërhequr një klient të rëndësishëm, por të festosh fitoret e vogla është po aq e rëndësishme. Falënderimi i punonjësve për marrjen e iniciativës ose për kryerjen e rregullt të atyre detyrave në dukje të zakonshme, por të rëndësishme është thelbësore.
-Një aspekt tjetër në të cilin menaxherët duhet të përqendrohen është falënderimi i grupeve të tilla si sanitarët, asistentët administrativë, apo edhe personeli i IT-së. Këta njerëz janë pjesë integrale e vendit të punës, por për shkak se nuk janë ‘yjet’ e ekipit, ata shpesh kalojnë pa u vënë re.
Nga poshtë-lart:
Si punonjës, është po aq e rëndësishme të kultivoni një kulturë mirënjohjeje. Marrëdhëniet tuaja të punës, mundësitë për t’u rritur profesionalisht dhe për të arrirë rezultate të larta, varen pikërisht nga kjo.
-Gjëja e parë që mund të bëni për të treguar mirënjohje si punonjës është pjesëmarrja në festat që organizohen në kompaninë tuaj.
-Empatia është shumë e rëndësishme në marrëdhëniet me kolegët. Nëse një koleg nuk është në momentin e tij më të mirë, ofrojuni ndihëm tuaj, sepse mendoni se si do të ndiheshit ju po të ndodheshit në të njëjtën situatë. Të jeni të sigurt se në fund, do t’ju falënderojnë dhe mbi të gjitha kjo do t’ju ndihmojë të ndërtoni marrëdhënie shumë të mira.
Falënderoni eprorët. Kjo është thelbësore; nëse prisni që shefat të tregojnë mirënjohje për ju, atëherë duhet të veproni në të njëjtën mënyrë.
Një faleminderit i thjeshtë, por i sinqertë për udhëzimet që ju ka dhënë, për një shpjegim që ju ka bërë, apo thjesht kthimi i një email-i mund të ndihmojë shumë në zhvillimin e një marrëdhënie reciproke mirënjohjeje midis menaxhmentit të lartë dhe punonjësve.
Për të gjithë:
Së fundmi, hapi më i rëndësishëm për të gjithë në një vend pune është që të jeni të sinqertë. Mos tregoni një kulturë mirënjohjeje sepse duhet por bëjeni sepse dëshironi dhe jeni vërtet mirënjohës për njerëzit me të cilët punoni dhe mundësitë që ju janë dhënë në punën që po bëni. Nuk është gjithmonë e lehtë, por vetëm duke qenë pak më shumë mirënjohës, ju do të ndikoni pozitivisht tek të gjithë ata që ju rrethojnë në ambientin e punës.
Gjithçka fillon me praktikë të vazhdueshme, në formën e hapave të vegjël! / Thrive Global
