Ministri i Jashtëm ukrainas Dmytro Kuleba ka folur në një konferencë për shtyp pas raundit të fundit të bisedimeve të sotme midis Ukrainës dhe Rusisë në Antalia të Turqisë.
Sipas mediave të huaja, përcjell Telegrafi, Kuleba thotë se të dy palët ranë dakord të vazhdojnë përpjekjet për të kërkuar një zgjidhje për çështjet humanitare në terren në Ukrainë.
Ai thotë se do të ishte i gatshëm të takohej sërish “në këtë format nëse ka perspektiva për një diskutim thelbësor dhe për të kërkuar zgjidhje”.
Kuleba ka shtuar se beson se kur takohen dy ministrat e jashtëm ata kanë mandatin të negociojnë çështjet e paqes dhe sigurisë.
Ai ka shtuar: “Unë jam gati të vazhdoj këtë angazhim me qëllimin për t’i dhënë fund luftës në Ukrainë, për të ndalur vuajtjet e civilëve ukrainas dhe për të çliruar territoret tona nga forcat pushtuese ruse”.
Ndërsa Sergei Lavrov, ministri i jashtëm i Rusisë, ka bërë të ditur se ai diskutoi çështje humanitare me homologun e tij ukrainas, duke përfshirë atë që “trupat po bëjnë për të mbrojtur civilët”.
Po sipas mediave të huaja, përcjell Telegrafi, Lavrov akuzoi gjithashtu “nacionalistët” ukrainas për përdorimin e civilëve si mburoja njerëzore.
Ministri tha gjithashtu se janë diskutuar korridoret humanitare në Ukrainë, duke shtuar se ato rrugë janë duke u përcaktuar nga ekipe nga secili vend.
Furnizimi me ushqime dhe stabiliteti i çmimeve në Evropë ishte gjithashtu në agjendë, u tha ai gazetarëve.
Duke iu përgjigjur një pyetjeje nga BBC nëse një armëpushim do të ishte i mundur, Lavrov tha se “operacioni special ushtarak” do të vazhdojë dhe se Vladimir Putin thotë se strategjia e tij do të planifikohet.
Kryediplomati rus tha gjithashtu se duke i ofruar ndihmë mbrojtëse Ukrainës, Perëndimi “po sillet në mënyrë të rrezikshme”.
“Ne nuk e sulmuam Ukrainën”, pretendon ai, duke shtuar se “Rusia po kërcënohej dhe duhej të mbronte rajonet e Donetsk dhe Luhansk, të cilat Rusia i sheh si të pavarura nga Ukraina”.
Në një pyetje në lidhje me bombardimin e një spitali në Mariupol nga CNBC, Lavrov tha se media nuk kishte dhënë një histori të ekuilibruar për atë që kishte ndodhur dhe se ndërtesa ishte bosh nga pacientë dhe nën kontrollin e “radikalëve” ukrainas. /Telegrafi/
