Në Zvicër vazhdojnë të paguhen shuma astronomike menaxherëve të lartë të kompanive të mëdha. Kjo ndodh edhe pas votimit të vitit kaluar nga populli, të iniciativës “kundër zhvatjes”.
Kështu, kryemanaxheri i kompanisë së madhe farmaceutike të Bazelit Joseph Jimenez për punën e tij të realizuar gjatë vitit 2013 është shpërblyer me 3.23 milionë franga. Kjo pagë që nuk ka ndryshuar nga ajo e një viti më parë, përmban rrogën fikse që është “vetëm” 2.06 milionë dhe pjesa tjetër janë shpërblime në forma të ndryshme si bonuse etj.
I dyti në listën e personave me pagat më të mëdha në Zvicër vjen po ashtu nga Novartis. Ai është David Epstein nga sektori Pharma, i cili ka fituar 9.27 milionë dollarë ose 8.32 milionë franga ndërsa në vendin e tretë është menaxheri Mark C. Fishmaninstitutit për hulumtime biomedicinale. Ai ka fituar 7.54 milionë dollarë që bëjnë 6.77 milionë franga.
I gjithë kreu prej 11 menaxherëve të Novartisit gjatë vitit që shkoi ka fituar marrë së bashku 67.7 milionë franga, është bërë e ditur në një raport të publikuar të mërkurën nga ky koncern. Këtu bën pjesë edhe ish shefi, Daniel Vasella, i cili me 2.98 milionë franga, është proporcionalisht njeriu më i paguar, kur dihet se ai ka punuar vetëm deri në fund të muajit shkurt të vitit të kaluar.
