“Ne nuk mund ta lëmë Kinën të dominojë. Unë dua që SHBA-ja të jetë e para në teknologji, shkencë, prodhim, inteligjencë artificiale (AI) dhe hapësirë”, tha kandidati presidencial republikan
Kandidati republikan presidencial i SHBA-së, Donald Trump, prezantoi planin e tij për të siguruar që SHBA-ja do të jetë kryeqyteti i kriptomonedhave i planetit dhe superfuqia e Bitcoinit në botë, raporton Anadolu.
“Nëse kriptoja do të përcaktojë të ardhmen, unë dua që ajo të minohet, të prodhohet dhe të bëhet në SHBA”, tha ai në Konferencën e Bitcoinit në Nashville, Tennessee.
“Nuk do të bëhet askund tjetër”, theksoi ai.
“Bitcoini ‘po shkon në Hënë’ dhe unë dua që Amerika të jetë kombi që udhëheq rrugën”, shtoi ai.
Trump tha se është krenar që është kandidati i parë i partisë kryesore në historinë amerikane që pranon donacione në Bitcoin dhe kriptomonedha.
“Kjo është (si) industria e çelikut 100 vjet më parë”, tha Trump për Bitcoinin.
“Në 15 vjet, Bitcoini është bërë aseti më i vlefshëm kudo në botë, tashmë është më i madh se ExxonMobil”, shtoi ai, duke iu referuar kompanisë më të madhe të energjisë në SHBA.
Trump e përshkroi arsyen e tij për të dalë në podium në konferencën e shumëpritur nga entuziastët e kriptomonedhave me dy fjalë: “Amerika së pari”.
“Nëse nuk e bëjmë ne, Kina dhe të tjerët do ta bëjnë. Pra, le ta bëjmë të parët dhe le ta bëjmë siç duhet”, tha Trump.
“Ne nuk mund ta lëmë Kinën të dominojë. Unë dua që SHBA-ja të jetë e para në teknologji, shkencë, prodhim, inteligjencë artificiale (AI) dhe hapësirë”, shtoi ai.
Ndërsa minimi i Bitcoinit konsumon shumë energji, sipas kritikëve, Trump tha se SHBA-ja do të prodhojë më shumë energji elektrike në të ardhmen sesa konsumi i saj total.
/AA/
