Federica Lezzi: Çdo ditë pres fëmijë të qëlluar direkt në kokë
Një kirurge nga Italia e cila punon në Rripin e Gazës tha se çdo ditë ajo merr mesatarisht katër fëmijë të goditur drejtpërdrejt në qafë dhe kokë, dhe se ajo kurrë nuk kishte parë një numër kaq të madh lëndimesh të rënda dhe një situatë kaq të tmerrshme në asnjë prej zonave të konfliktit ku ajo ka punuar.
Federica Lezzi, 40 vjeçe, e cila punon si kirurge me Mjekët pa Kufij në spitalin Deir al-Balah në Rripin qendror të Gazës, tha – në një intervistë telefonike për gazetën italiane Corriere della Sera, se ajo ishte tronditur nga numri i madh i viktimave të moshës dy deri në 15 vjeç, të qëlluar në kokë dhe qafë.
Ajo shtoi se kirurgët shohin qartë pikën e hyrjes së plumbit në kokë, nga e cila nuk ka asnjë gjurmë të daljes së tij. Ajo përmendi rastin e Majid, një djali gjashtë vjeçar i cili jetonte në një tendë në periferi të Deir al-Balah pasi kishte ikur nga veriu me familjen e tij, të gjithë anëtarët e të cilit u vranë përveç babait të tij.
Lezzi tregoi se si Majid u dërgua në spital me një karrocë gomari pasi u gjet duke vdekur pranë çadrës së tij, se si ai hyri në operacion në një gjendje kaq kritike nga një vrimë plumbi në kokën e tij.
Mjekia italiane shtoi se këta plumba zakonisht shpërthejnë në kokë dhe se mjekët nuk kanë shumë mundësi, sepse nuk janë të pajisur për operacione kaq komplekse. Ky lloj plumbi i mori jetën Mejid-it pasi ishte në koma për disa orë.
Mjekja përmendi se çdo ditë kryen 40 operacione, 15 prej të cilave në fëmijë. Ajo nuk pranoi të komentojë nëse shënjestrimi i kokës dhe qafës ishte i qëllimshëm apo jo, vetëm duke thënë se me siguri do të ketë një numër të madh personash me aftësi të kufizuara në brezin e ardhshëm në Gaza.
Përpara se të kthehej në Gaza në fillim të muajit të kaluar, Lezzi punoi me MSF në disa nga zonat më të rrezikshme të konflikteve në botë, duke përfshirë: Sirinë, Irakun, Afganistanin, Libinë, Somalinë dhe Haitin.
Izraeli ka reduktuar zonën humanitare në Gaza në vetëm 40 kilometra katrorë, ku janë grumbulluar 1.6 milionë persona të zhvendosur, që është një tregues – sipas mjekut italian – se dëshiron të shtyjë të gjithë banorët e Gazës drejt detit.
Spitali në Deir al-Balah është i vetmi spital në pjesën qendrore të Rripit të Gazës që është ende duke punuar, por bombardimet izraelite rreth tij u intensifikuan javën e kaluar.
Mjekia italiane tha se bombardimet javën e kaluar ishin aq të dhunshme sa që shumë nga të zhvendosurit filluan të lëviznin drejt Khan Younis në jug, drejt bregdetit i cili tashmë është i mbuluar me tendat e njerëzve të zhvendosur nga zona të tjera. Shumica e pacientëve janë larguar nga spitali, kanë mbetur vetëm rreth njëqind të cilët nuk mund të lëvizin për shkak se u janë prerë gjymtyrët, ose janë lënduar në kokë ose janë në terapi intensive, përveç fëmijëve dhe grave me lëndime në stomak.
Situata është rënduar më tej nga bllokada e madhe e ndihmave humanitare, duke përfshirë ilaçe, madje edhe ato emergjente, si analgjezikët dhe anestetikët, të cilave u duhen deri në dy muaj për të marrë lejen për të hyrë në Gaza, sipas Lezzi-t. Ajo shtoi se frika më e madhe e fëmijëve është se mund t’i nënshtrohen operacionit pa anestezi. /tesheshi.com/
