Në një garazh në Chavanes-pres-Renens të kantonit Vaud, në afërsi të Lozanës është gjetur kufoma e një 29 vjeçari të vrarë. Fjala është për një shtetas zviceran me prejardhje kosovare, njofton policia.
Në trupin e të vdekurit janë gjetur disa predha. Policia është njoftuar për rastin të hënën në orën 15.40, thuhet në një komunikatë të Policisë së Kantonit Vaud, e cila e kishte gjetur trupin e të vdekurit të shtrirë në garazh.
Në oborr ndodhej vetura e tij, motori i të cilës vazhdonte të ishte i ndezur, transmeton Albinfo.ch.
Policia është duke ndjekur disa pista të krimit, ka thënë një zëdhënës i saj për mediet zvicerane.
Viktima nuk ka qenë e njohur për policinë deri më tash. Kufoma e tij do t`i nënshtrohet obduksionit.
30 policë me dy qenë gjurmues kanë vëzhguar të martën terrenin ku është gjetur i vrari, por nuk kanë gjetur asnjë indikacion. Policia shpreson se do të ketë të dhëna rreth vrasjes pas shpalljes së kërkimit të dëshmitarëve të rastit.
